NHM hnuaia thawktute chawlh avangin Health Department hnathawh tam tak a khaihlak

National Health Mission (NHM) hnuaia thawktute chuan sawrkar laka an thilphut nawrna atan nimin atang khan ni 3 awh turin Mass Casual Leave an la a, Health Department hnuaia hnathawh hrang hrang khaihlakin, Serchhip District-a NHM hnuaia thawktute pawhin he lungawi loh lantirna hi zawmin chawlh hi an la a ni.


National Health Mission (NHM) Employees Union Mizoram (NEUM) te hian Hlawh an lak mumal loh thin chungchang ah te, rei tak lo thawk tawh te a ngheta luh theihna kawng siam turte, Medical Reimbursement an neih ve nan te, Health Department a hna lak a awm ah engemaw zat an hauh ve theihna tur te leh Transfer TA/DA an neihna tura an thlen thin te tih thlawhtlin ala nih loh avangin nimin atang khan Mizoram puma an member te chuan a huho in chawlh an la a, Serchhip District-a NHM hnuaia thawk te pawhin chawlh hi lain Health Department hnuaia hnathawh hrang hrang a khaihlak phah nasa hle a, hmun thenkhat ah chuan OPD kalpui mumal theihloh in a awm bawk a ni.


NHM Employee Union of Mizoram (NEUM) Sub-Hqrs. Serchhip hruaitute chuan Serchhip District-ah NHM hnuaia thawk mi 157 an awm thu sawiin, heng te hi Doctor 14, Health Worker 28, Staff Nurse 22, Health & Wellness Officer 22, Lab. Technician 11, X-Ray Technician 5, Pharmacist 4, Opthalmic Assistant 3, Driver 9 leh Office leh Programme danga thawk mi 39 an ni tih an sawi a. Nimin atanga a huho-a chawlh an lak avang hian hna kallai tam takah harsatna a thlen dawn nia an hriat thu an sawi a, Serchhip CMO Office-a thawktu tam zawk te chu NHM hnuaia thawk an nih avangin nimin khan CMO Office hi hawn ni mah se thawktu kal tur an awm mumal lo a ni.

NEUM hruaitute sawi danin Serchhip-a AYUSH OPD-a thawktu Doctor pahnih te chu NHM hnuaia thawk an nih avangin nimin khan OPD kalpui theih a ni lova, Chhingchhip leh Ngentiang PHC-a OPD te chu hawn ni mah se thawktu tam zawk NHM hnuaia thawk an nih avangin pan tur an awm mumal lo a, Serchhip District chhungah Sub-Centre leh Health Clinic 35 awm ah dan pangngaia hawn theih 9 chiah a awm a. District Hospital OPD Lab-a thawktu 7 zinga 4 leh District Hospital-a Staff Nurse 21 zinga 9 te chu NHM hnuaia thawk an nih avangin harsatna a thleng a, Serchhip Main Centre-ah thawktu mi pakhat chiah kalin COVID-19 Report khawih tur pawh an awm lo niin an sawi a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man