India President thlang turin Mizoram-ah inbuatsaihna ngawrh taka kalpui mek a ni

Karleh Thawhtanni, July 18, 2022-a India President thlanna neih tur atan inbuatsaihna kalpui mek niin Mizoram-ah pawh hemi atan hian inbuatsaihna kalpui mek a ni.

India President thlanna neih tur atana inbuatsaihna chungchangah hian nimin khan Assembly House Committee Room-ah ARO & Presiding Officer H. Lalrinawma, Commissioner & Secretary, Mizoram Legislative Assembly chuan thuthar thehdarhtute kawmin an ruahmanna te a hrilhfiah a, President thlanna vawi 16-na neih turah hian Contesting candidate pahnih- Droupadi Murmu Baidaposi leh Yashwant Sinha, Uttar Pradesh te awmin tun thla ni 18-a inthlanna neih turah hian zing dar 10:00 atanga tlai dar 5:00 thlengin Vote thlakna hun hawn a ni dawn a, Mizoram-ah chuan Mizoram Legislative Assembly Main Building-a Committee Room-ah vote hi thlak theih a ni dawn a, inthlanna atan hian Election Commission of India ta Ballot Box chu hman tur niin Election Commission of India Office atanga Ballot Box, Ballot Paper leh a kaihhnawih lehkha dangte la turin Joint Chief Electoral Officer leh Deputy Secretary, Mizoram Legislative Assembly Secretariat te chu kalin tunkar Ningani hian rawn hawpui hman tura ruahman a ni a, Lengpui Airport atangin Police Escort-na hnuaiah Strong Room, Assembly House-ah thlenpuia dah tur niin Strong Room hi darkar 24 chhung Police-in an veng dawn a ni.

Tun tuma India President thlanna neih turah hian ramchhunga State leh UT hrang hranga MLA 4033 bakah Lok Sabha MP 543 leh Rajya Sabha MP 233, an vaiin MP 776 ten Vote an thlak thei dawn a, Vote thlak thei zawng zawng hi 4809 niin an Vote hlut dan a inan loh avangin Vote nei zawng zawng hlutna hi 10,86,431 a ni dawn a, Mizoram-a MLA pakhat Vote hlut zawng chu 8 niin MP pakhat Vote hlut zawng chu 700 a ni dawn thung a. MP te hi Parliament House-ah vote thlak tura ngaih niin MLA te chu mahni Home State, Assembly House-ah vote thlak tura ngaih an ni bawk a. Engemaw tul avangin Delhi leh State dang Headquarters-ah vote thlak phalsak theih niin, amaherawhchu inthlan ni hma ni 10 tal ah Returning Officer hnenah dilna thehluh tur a ni thung.

He inthlanna a Vote thlak hi zawhfel a nih hnu a tuk, July 19, 2022-ah Assistant Returning Officer in Returning Officer hnenah thehlut tura Election Commission of India in a ruahman angin H. Lalrinawma, Commissioner & Secretary, Presiding Officer-in Officer pakhat hruaiin venhimna hnuaiah Returning Officer Office, Parliament House-ah a dahlet dawn a, Vote tla te hi July 21, 2022 khian Returning Officer Office Room No. 63, First Floor, Parliament House, New Delhi ah chhiar a ni ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar