Mizoram Remna a hlawhtlinna turin Pathian in engkim a chuktuah rem khawm vek - Chief Minister

Chief Minister Zoramthanga chuan Mizoram in Remna nei tura hmalak chhung chu rei mah se a hlawhtlinna turin Pathian in engkim a chuktuah rem khawm vek a ni, a ti.

Remna Ni puala inkhawm nimin-a Aizawl Vanapa Hall-a neih a hmanpuina ah he thu hi sawiin Chief Minister Zoramthanga chuan India sawrkar, Mizoram sawrkar leh Ramhnuai sawrkar ten Remna Thuthlung an ziah chu “India sawrkar duh ang taka siam a nilo, Mizoram mipui duh dan ang tak pawh a ni lo, ramhnuai sawrkar duh ang tak a duan pawh a nilo, mahse kan sirtluk a kan inrem theihna tur, Pathian in kan vaia kan pawm tlan theih inremna min pek a ni e,” a ti a. Remna nei tura hmalak chhung hi rei mahse a hlawhtlinna turin Pathian in engkim a chuktuah rem khawm vek a ni tih sawiin, kawng hrang hranga remna Mizoram in a neih theih nana mi hrang hrangin hma an lak dan te a sawi bawk. Chief Minister chuan he inremna ropuina chhan pakhat chu ram Danpui a chuang, Mizoram humhalhna tur hlu tak a ken vang a nih thu sawiin, Article 371G hnuaia inziak chu Party pahnih te'n sacrifice siam ve ve chunga inremna an ziah avanga lo piang a nih avangin thuneitu pakhat in a duh ang anga a siam, a duha a hnuhlet leh mai mai theih thil a nih loh thu a sawi bawk.

Chief Minister Zoramthanga chuan Remna Ni champha vawi 36-na ah hian remna tluangtling a nih zia a langchiang zel tih sawiin, Zoram remna hi State dang leh ram dang mite pawhin an awh thu leh thenawm State-ah te pawh inremna thuthlung ziah hriat tur awm thin mahse harsatna an tawh zui leh thin thu a sawi a, Mizoram ah chuan inremna ziah hnuah Zoram buai siamtu an awm tawhlo a ni, a ti. Chief Minister chuan Mizoram hian khawl thilsiam lian tak tak thawnchhuah tur neilo mah ila, export tur kan neih, mi in an duh ber chu Zoram in remna kan neih ang hi a nih thu a sawi a. A hmanna tur dik takah hmangin, remna siamtu ah Zoram mipuite hi tang a, remna hna thawktu kan nih a duh thu a sawi a, chu chu Pathian in remna min siam sak chhan pawh a ni ngei ang, a ti.

Aizawl-a Remna Ni puala inkhawm hi Chief Secretary mawhphurhna la mektu Navin Kumar Choudhary chuan kaihruaiin Remna Ni documentary thlirho a nih bakah Remna leh muanna atana nunna chanta te zahna lantirna hun hman a ni bawk.