Mizoram Electoral Roll atangin Bru mi leh sa Tripura-a awm tur 1044 paih an ni tawh

Bru mi leh sa Mizoram-a Vote nei, Tripura Transit Camp-a awm leh Tripura-a cheng zui turte chu Mizoram Electoral Roll atanga paih mek zel niin Mizoram Election Department chuan tun dinhmunah an zinga mi 1044 te chu Mizoram Electoral Roll atangin paih an ni tawh.

Mizoram Election Department hotute chuan Mizoram-ah hian Bru mi leh sa, Tripura Transit Camp-a awm zingah Mizoram Electoral Roll a hming chuang mi 11,757 an awm thu sawiin, heng te hi Mamit, Kolasib leh Lunglei District-a Vote nei te an ni tih an sawi a, Bru mi leh sa raltlan Tripura Transit Camp-a awm te hi Tripura-ah an awm ngheh theih nan Sawrkar laipui leh State pahnih – Mizoram leh Tripura aiawh leh Bru hruaitute aiawhin kum 2020 January khan inremna ziah alo ni tawh a, inremna ang chuan Tripura Transit Camp a awmhlen tur leh an awm nghehna tur In leh lo zawng zawng chu Tripura sawrkarin a ngaihtuah sak dawn a ni.

Hetianga inremna ziah a nih hnu hian Tripura-a awmhlen tur zinga Mizoram-a Vote nei te chu Mizoram Electoral Roll atanga paih mek an ni a, Mamit District-a Hachhek, Dampa leh Mamit Constituency atangin vote nei 882 paih ni tawhin, Kolasib District atangin Tuirial, Serlui leh Kolasib Constituency atangin voter 152 paih an ni a, Lunglei District-ah Thorang, West Tuipui leh Lunglei South Contituency atangin Voter 10 paih an ni ve bawk.

Bru mi leh sa Tripura Transit Camp-a awm mek te chu Mizoram Electoral Roll atangin paih nghal vek theih an ni lo tih Election Department hotute chuan sawiin, Tripura Roll-a ziahluh an nih dawnah chauh Mizoram Roll atangin paih dilna an siam thei a, Tripura Roll-a la inziaklut lo te chu paih mai theih la ni lovin tun dinhmunah erawh inziaklut an awm zel a, heng te hi Mizoram Electoral Roll atanga paih ve nghal zel an ni.