Mizoram-ah a vawi khatna atan Heart Surgery nei

Mizoram-a a vawi khatna atan Inrinni kalta, July ni 16, 2022 khan Trinity Hospital (Silaimual, Aizawl)-ah Heart Surgery neih a ni a, Dr. Rahul Chandola, Cardio-Thoracic and Vascular Surgeon (CTVS) leh a Team-ten Lung natna nei mipa kum 59-mi chu a awm zai hawngin, Heart Surgery chi khat, Coronary Artery By-pass Graft (CABG) hlawhtling takin an ti nia thudawn a ni.
Dr. Chandola sawi danin he damlo hi High Risk Cardiac Patient (serious tak) niin a Lung chawmtu Thisen dawt engemaw zat a pin avangin thisen a kal thei lova, Lung hnathawh dan (heart function) chu nasa taka tlahniamin, 25% vel chauh niin a sawi a, he damlo hi darkar li chuang an khawih a, a thisen dawt ping hmun thum-ah by-pass a ni. He damlo hi zai a nih hnuah a ziaawm hle nia a hmuh thu leh ICU-ah dah nghal a nih thu Doctor chuan sawiin, damlo hi discharged theih a nih hma chuan he Medical Team hian hawsan loin an vil zui dawn tih a sawi bawk.

Trinity Hospital hotute chuan rei tak an lo tum leh suangtuah, Mizoram ngeia Lung natna zai theih a ni ta chu Pathian hruaina liau liau nia a hriat thu a sawi a, hemi atan hian ‘Cardio Thoracic Lab’ an din bakah Heart by-pass surgery atana khawl pawimawh te pawh tunhnaiah Trinity Hospital-ah hian bun thar a nih thu leh inzaina man pawh phai lam aiin a tlawm zawk mai theih thu a sawi a. He Heart Surgery atana thisen mamawh te Civil Hospital, Synod Hospital leh ZMC-a Blood Bank-ten phal taka an ngaihtuahsak avanga an lawm thu an sawi bawk a ni.