COVID-19 hri kai enkawllai 768 la awm mek

Pathianni khan Mizoram-ah COVID-19 hri kai mi 57 hmuh belh leh niin nimin-ah enkawl dam mi 481 chhinchhiah belh an ni thung a, Mizoram-ah hri kai enkawllai pawh nimin tlai thleng khan mi 768 an ni leh tawh a ni.

Pathianni khan Mizoram-ah Sample 212 enfiah leh niin heng atang hian COVID-19 hri kai mi 57 te hi hmuhchhuah an ni a, Sample enfiah atanga chhutin za zela 26.89 te chuan hri an kai a ni. Pathianni khan Mizoram-ah Rapid Antigen Test hmang chiahin Sample enfiah a awm a, hri kai hmuhchhuah te hi Saitual District-ah 28, Aizawl District-ah 15, Lunglei District-ah 11 leh Mamit District-ah mi 3 te an ni.

Tunhnaiah Mizoram District hrang hranga NHM hnuaia thawk te an nawrh avanga hri kai enkawl dam report a mumal loh deuh hnuah nimin khan District hrang hrang 8 atangin hri kai enkawl dam mi 481 zet chhinchhiah thar an ni a, heti hian nimin tlai thleng khan Mizoram-a CO-VID-19 hri kai hmuhchhuah tawh chu 2,30,646 niin an zinga 2,29,172 te chu enkawl dam an ni tawh thung a, hri kai hmuhchhuah atanga chhutin za zela 99.36 te chu enkawl dam ni tawhin hri kai enkawllai mi 768 an la awm mek a, hri kai zingah mi 706 boral tawhin Aizawl District (367) leh Lunglei District (224) te chu hri kai enkawllai tam zualna an ni.