MHIP Day vawi 48-na hmun hrang hrangah lawm a ni

Mizoram-a hmeichhia te insuihkhawmna pawl lian ber, Mizo Hmeichhe Insuihkhawm Pawl (MHIP) chuan nimin July 6, 2022 khan an pawl dinchampha vawi 48-na chu hmun hrang hrangah an lawm a, Serchhip Sub-Hqrs. MHIP hnuaia Branch hrang hrangte pawhin an remchan angin MHIP Day hi an lawm a ni.


COVID-19 hri leng avanga kum 2 chhung MHIP Day mumal taka lawm theih a nih loh hnuah MHIP Day vawi 48-na hi nimin khan hmun hrang hrangah urhsun taka lawmna neiin hun hman a ni a, Serchhip-a MHIP Branch hrang hrangte pawhin anmahni remchan anga hun hmangin Branch tam zawk chuan chawhma lamah MHIP Day puala inkhawm neiin chawhnu lamah intihhlimna neiin hun an hmang chhunzawm bawk a, Vantlang tana thil tha tihna atan hun hmanga nileng-a hnatlang nei Branch te pawh awmin mi harsa tanpuina atan leh damlo kanna hun atana hmang te pawh an awm a, engemaw harsatna avanga he ni lawm lo Branch tlem an awm bawk a ni.

Serchhip Sub-Hqrs. MHIP President Lianthangi leh hruaitu thenkhat te chuan nimin khan Keitum Branch MHIP kum 40 tlin lawmna leh MHIP Day puala inkhawm chu an hmanpui a, Sub-Hqrs. MHIP Vice President Sanghming-liani chuan MHIP Day hi Kanghmun South-ah hmanpuiin Treasurer Lalhmunthangi chuan Serchhip Hmar Veng Branch-ah a hmanpui bawk a. Ser-chhip Hmar Veng Branch MHIP te hian an din-champha kum 25-na lawm nghal bawkin hruaitu hlui te chawimawina hun te hmangin tlai lamah Jubilee lawmna ruai an kilho bawk a ni.

MHIP tia hriat lar, Mizo Hmeichhe Insuih-khawm Pawl hi July 6, 1974 khan din niin tunah hian Sub-Headquarters 10 neiin Block 27 a din bakah Mizoram pumah Branch 730 chuang a awm bawk. Hmeichhia te hamthatna kawnga nasa taka hma lain ‘Mite Tanpui’ tih chu Thuvawn atan an nei bawk a ni.

Comments

Popular News (Last 30 Days)

LPG man bithliah thar