India President thar thlang turin Vawiin ah MP leh MLA rual ten Vote an thlak dawn

India President thlanna chu Vawiin hian rampumah neih tura ruahman niin he inthlanna nei tur hian Mizoram pawh a inpeih tawh a, tun tuma President thlanna ah hian NDA Candidate Droupadi Murmu chuan Mizoram MLA 40 zinga 29-ten vote-in eptu lam Candidate Yashwant Sinha chu MLA 11-in an vote dawn nia hriat a ni.

Vawiin a President thlanna neih tur atan hian Mizoram-ah chuan Vote thlakna hi hmun khat, Assembly House Committee Room-ah siam a ni dawn a, Vote hi zing dar 10:00 atanga thlak tan theih a ni dawn a, tlai dar 5:00 thleng hun hawn a ni anga, Vote thlakna Ballot Box hi naktuk, Thawhlehni hian Assembly Secretary & Commissioner H.Lalrinawma chuan New Delhi a panpui dawn a, he inthlanna neih tur atana inbuatsaihna hi Inrinni khan Observer Surendra Singh IAS hovin mi pawimawh ten an thlirho a, inthlanna atana inbuatsaihna te chu a lungawithlak an tih thu an sawi a ni.

Tun tuma India President thlan turah hian Mizoram-a rorellai, MNF chuan NDA candidate Droupadi Murmu an vote tur thu hi an tichiang tawh a, MNF Legislature Party Secretary L.Thangmawia chuan NDA candidate an vote tur thu hi tunhnaia Mizoram rawn tlawhtu NDA Presidential Candidate hnenah an party President Zoramthanga chuan a lo hrilh tawh tih a sawi a. “NDA candidate kan vote tur thu hi kan tichiang tawh a, kan MLA-te pawh kim vek kan tum a. Thawhtanni chhun dar 12:00 hian inhmuhkhawma vote thlak dan chungchang hi inhrilhhriat kan tum a ni,” a ti a. BJP Mizoram Pradesh hruaitute chuan an MLA Dr. BD. Chakma chuan NDA Candidate hi a vote tur thu an sawi bawk. 

Hetihlai hian Eptu Party, Zo Peoples Movement Legislature Party Secretary Dr. Vanlalthlana pawhin an vote tur chu tichiang tawhin eptu Candidate, Yashwant Sinha an vote dawn tih a sawi a. “NDA-ah kan awm lem lo bawk a; chuvangin, NDA lo lam hi vote ila kan ti a, a huhovin vote pawh thlak ila kan ti a ni,” a ti a. Eptu Party bawk Congress Legislature Party pawh nimin khan Yashwant Sinha an vote tur thu hi an tichiang nia thudawn a ni bawk.