Hri kai enkawllai 46 la awm

Serchhip District-a COVID-19 hri kai te zingah nimin khan mi 24 te chu enkawl dam an ni ve leh a, hri kai enkawllai erawh mi 46 an la awm.

Nimin khan Serchhip District-ah COVID-19 hri kai mi 10 hmuhchhuah belh leh an ni a, an zingah mi 7 te hi Thentlang khuaa hri kai hmuh te niin Chhiahtlang-ah hri kai mi pahnih hmuh an ni ve leh bawk a, hei bakah hian Thenzawl Vengthlang-ah hri kai mi pakhat hmuh a ni bawk.

Hetihlai hian nimin khan Serchhip District-ah hian COVID-19 hri kai enkawl dam mi 24 an awm a, an zinga mi 23 te hi PTS Thenzawl a mi te niin Serchhip Chanmari Veng-ah hri kai enkawl dam mi pakhat a awm bawk. Heti hian nimin tlai thlenga Serchhip District-a COVID-19 hri kai hmuhchhuah tawh chu 14,083 niin an zinga 14,002 te chu enkawl dam an ni tawh a, hri kai hmuhchhuah atanga za zela 99.42 te chu enkawl dam ni tawhin hri kai enkawllai mi 46 an la awm a, hri kai zingah mi 35 an boral tawh bawk a ni.