Gauhati High Court Judge in Serchhip tlawhin District Court dinhmun leh hnathawh dan a enfiah

Gauhati High Court Judge leh Portfolio & Station Judge, Justice Michael Zothankhuma chuan nimin khan lehlanga Serchhip District rawn tlawhin Serchhip District Court hnathawh dan leh a dinhmun te a enfiah a, sawrkar hotute nen inkawmna an nei nghal bawk. 

Justice Michael Zothankhuma hi Serchhip District Court-ah Bawrhsap mawhphurhna chelh mektu Lalmuansanga Ralte bakah Judicial Magistrate Renee Lalremsiami, Addl. SP Saidingliana Sailo, Serchhip DIPRO K. Saitluanga, Asst. Commissioner of Excise & Narcotics B. Ngurchhuana, Serchhip District Jail Superintendent Laldingliana Chinzah leh District Court-a thawktuten bakah Ukil ten an lo dawngsawng a. Hemi hnu hian Serchhip District Court Building-a Court Room-ah inkawmna nei nghalin Justice Michael Zothankhuma chuan, dan angin District Court endikna neia a lokal thu sawiin, Court in file a kalpuite, Case awm mekte, District Court in mamawh a neih leh Quarters te leh hmabak a neih hrang hrangte en tura rawn kal a ni tih a sawi a ni.

He hunah hian Serchhip District Jail dinhmun leh harsatna an neih leh neih loh te, Police Department in District Court nena an thawhhona kawngah harsatna an neih leh neih loh te, Excise & Narcotics Department lamin Court nena an indawrna kawngah harsatna an neih leh neih lohte zawtin, heng thawktute hian harsatna em em an neih loh thu leh Judicial Officer indaihlohna awm erawh harsatna tenau siamtu a nih thu an sawi a, National Highway No. 54 laihzauh hna thawh mek chungchangte pawh an sawiho bawk.

District thuneitute nen inkawmna an neih hnu hian Serchhip District Court Building fang nghalin District Court-a Ukil hnathawk mekte nena inkawmhona an nei bawk a, an mamawh hrang hrang leh harsatna an neih te zawtin, District Court-a File kalpuite a en sak bakah mamawh an neih hrang hrangte a enpui bawk a ni.

Hemi hnu hian Serchhip Khawtetlang-a Judicial Complex pawh a tlawh nghal a, helai hmunah hian Officers Quarters tur sa-a luahluh a nih hnuah tunhnaiah thawktu indaihlohna avanga Building ruaka awm mek dinhmun te pawh a enfiah nghal a, hemi hnu nimin chawhnu lam khan Aizawl a pan leh nghal a ni.