COVID-19 laka fimkhur thar turin ngen

Mizoram-ah COVID-19 hri kai kan pun leh mek avanga fimkhurna kawnga tan la thar tur leh infuih thar turin Dr. Pachuau Lalmalsawma, Spokesperson & State Nodal Officer on COVID-19 chuan mipuite a ngen.

Hemi chungchanga thuchhuah a siamah Dr. Pachuau Lalmalsawma chuan COVID-19 hripui leng mekin ziaawm a pan tawh a kan hriat laiin tunhnaiah khawvel pumah hri kai thar an pung leh tih sawiin, Khawvel, India leh hmarchhak State dinhmun thlirin COVID-19 vei nei tawh mang lote pawhin an nei thar leh hlawm thu leh India hmarchhak State hrang hranga hri kai mek awm zat belhkhawm atanga chhutin zaa 30.53 (30.53%) hi Mizoram a hri kai awm mek zat an nih thu a sawi a ni.

Tun dinhmuna hri kai mi 338 awm mekte zingah nunna chan awm lo mahse an zinga thenkhat hi In lama na tak tak leh damdawi In a awm mekte an nih thu sawiin, symptom lanchhuah hnu pawha an nat viau hma chu in test lo, an in test hnua lo tlai tawh si tunhnaiah nunna chan zingah pawh an awm tih a sawi a. Natna lanchhuah tan tirh emaw, inrinhlelh veleh emaw a in test ngei ngei turin mipuite a ngen a. Invenna man tlawm, hri kai hnua senso hautak viau bawk si COVID-19 laka kan him theihna turin khawvelin a invenna tha ber nia a la hriat COVID Appropriate Behaviour (CAB) uar thar leh turin mipuite a chah bawk.