COVID-19 hri kai enkawllai 231 la awm mek

Mizoram-ah COVID-19 hri kai pung zelin nimin tlai thleng khan hri kai enkawllai pawh mi 231 an awm leh tawh.

Tunhnaiah Mizoram-ah COVID-19 hri kai hmuhchhuah an pung zel a, Zirtawpni khan Sample enfiah 200 awmin heng atang hian COVID-19 hri kai mi 41 hmuh an ni a, Sample enfiah atanga chhutin za zela 20.05 te chuan hri an kai a ni. Hri kai hmuhchhuah zinga mi 40 te hi Rapid Antigen Test hmanga hri kai hmuh niin Aizawl District-ah 17, Lunglei leh Serchhip District-ah mi 10 ve ve leh Saitual District-ah mi 3 te an ni a, ZMC-a RT-PCR Laboratory atangin hri kai mi pakhat hmuh a ni bawk. Inrinni khan Mizoram ah Sample 102 enfiah ni bawkin heng atang hian COVID-19 hri kai mi 15 hmuhchhuah an ni a, heng te hi Rapid Antigen Test hmanga hri kai hmuh te vek niin Sample enfiah atanga chhutin za zela 14.71 te chuan hri an kai a, Aizawl leh Lunglei District-ah hri kai mi 5 ve ve hmuh niin Mamit District-ah 3 leh Kolasib leh Saitual District-ah hri kai mi pakhat ve ve hmuh an ni bawk.

Inrinni khan Mizoram District 5-ah COVID-19 hri kai enkawl dam mi 46 awmin nimin khan District pahnih atangin hri kai enkawl dam mi 37 an awm leh bawk a. Heti hian nimin tlai thleng khan Mizoram-a COVID-19 hri kai hmuhchhuah tawh chu 2,29,162 niin an zingah hian mi 2,28,226 te chu enkawl dam an ni tawh a, hri kai hmuhchhuah atanga chhutin za zela 99.59 te chu enkawl dam an ni tawh a, hri kai enkawllai mi 231 an la awm a ni. Inrinni khan Aizawl Saikhamakawn leh Chanmari West-ah COVID-19 hri kai boral mi pakhat ve ve awm lehin Mizoram-a COVID-19 hri kai zingah mi 705 an boral ta bawk a ni.