Chess Olympiad Torch Relay in Mizoram rawn thleng

Chess Olympiad puala Torch Relay (meichher) hmasa ber neih mek chuan nimin khan Mizoram rawn thlengin hemi pual hian Lengpui Community Hall-ah inkhawm buatsaih a ni.

He Torch Relay hi June 19, 2022 atanga July ni 28, 2022 thleng neih tur niin July 18, 2022 atanga August 10, 2022 chhunga Chennai, India-a 44th Chess Olympiad neih tur puala buatsaih a ni a. He meichher hian ni 40 chhungin India ram khawpui hrang hrang 75 a tlawh hnuah July ni 28, 2022 hian Chess Olympiad neihna hmun tur Chennai khawpui a lut ang a, inelna tan nghal a ni ang.

Torch Relay puala inkhawm buatsaih hi Sports Minister Robert Romawia Royte chuan khuallian nia hmanpuiin khawvel pum huap infiamna puala buatsaih meichher-in Mizoram a rawn thleng chu thil ropui tak leh ni chhinchhiahtlak a ni tih a sawi a. Chess chu infiamna upa leh zahawm tak a nih avangin a hlu hle nia sawiin, Chess chu game hautak lo tak a nih rualin thluak sawizawina tha tak, ngaihtuahna fim hman theih tulna leh ruihtheih thila insum ngai a ni tih sawiin, zirlaite leh thalaite phei chuan uar se a duh thu a sawi a ni.

He hun hi Sports & Youth Services Department Director Joseph H. Lalramsanga chuan kaihruaiin Mizoram Chess Association President Dr. Lalhmuchhuaka'n thu a sawi a, Grandmaster Mitrabha Guha-in khuallian hnenah Olympiad Torch (meichher) a hlan hnuah inkhawm tan niin, he inkhawmah hian Grandmaster hian Mizoram Chess Association in Chess player a thlanchhuante a rualin a inkhelhpui a, programme zawh hian khuallian chuan meichher hi Grandmaster hnenah hlan let lehin nimin chawhnu dar 1:45 khan Lengpui Airport panin an kir a, Arunachal Pradesh a pan leh nghal a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar