‘World Bicycle Day, 2022’ denchhenin Serchhip-ah Bicycle Rally neih a ni

India ram Zalenna kum 75-na lawmna, Azadi Ka Amrit Mahotsav kal zelah ‘World Bicycle Day, 2022’ denchhenin nimin khan Serchhip-ah Bicycle Rally neih a ni a, he ni denchhena Bicycle Rally neihna tur hian Mizoram-ah Serchhip leh Aizawl District chu thlan a ni.

Nimin-a‘World Bicycle Day, 2022’ denchhena Bicycle Rally hi Ministry of Youth Affairs & Sports hnuaia Nehru Yuva Kendra Sangathan (NYKS), Serchhip District buatsaiha neih a ni a, he Rally-a tel te hi Govt. Serchhip College Gate atangin he College Principal PC. Lalremsiama chuan a vailiam a ni. Nimin-a Bicycle Rally hi Govt. Serchhip College Gate atanga Eklavya Model Residential School, Kawlritlang thleng neih a ni a, he hunah hian mi 35 telin Lunglei atangin mi 25, Thenzawl atangin mi 4 leh Chhiahtlang atangin mi pakhat an ni a, Serchhip heng mite bakah hian naupang mi 5 telin he Rally-a tel zingah hian hmeichhia pahnih an tel bawk a, ruahsur hnuaiah hlawhtling takin Rally hi neih a ni a, he huna tel te hi T-Shirt pek theuh an nih bakah Certificate sem theuh an ni bawk.

NYKS Serchhip District-a District Youth Officer Amlanjit Hazarika chuan Cycle Rally an buatsaih chhan ber chu thalaite zingah Cycle hmanga insawizawi thatna te, Cycle hman uar hi boruak thianghlim tibawlhhlawhtu khawl khu tihtlemna atana a pawimawhna inhrilhhriat nan te, khawvel lo lum zel tur venna atana Cycle hman uar deuh deuh a tulzia inkawhhmuh nan te, mahni hriselna atana taksa sawizawi uar a thatzia inzirtirna atan te a nih thu a sawi a. India rama District 623-ah hetiang Rally hi buatsaih anih thu leh chung zinga District 75-ah te chuan lian tham taka Rally an neih thu te, Mizoram-ah chuan Aizawl leh Serchhip District-ah a lian thama an buatsaih thute a tarlang bawk.

Aizawl-ah chuan Bicycle Rally hi Sports & Youth Services Department-a Secretary Dr. Lalrozama IAS hova neih a ni a, Rally hi Aizawl Vanapa Hall kawt atanga neih niin Solomona Temple, Chawlhhmun thleng neih a ni a, he Bicycle Rally-ah hian Mizoram Cycling Association atangin cyclist mi 60 vel telin Rally tawpna hmun Solomon Temple-ah hian hun hman a ni.