Union Cabinet Minister in Mamit District a tlawh

Fisheries, Animal Husbandry & Dairying changtu Union Cabinet Minister Parshottam Rupala chuan nimin khan Mamit khawpui chhunga Sawrkar Officials te leh Central Schemes hrang hranga hamthatna dawngtute kawmna a nei.

Union Minister Parshottam Rupala hian Pathianni tlai khan Mamit hi thlengin nimin khan Mamit DC Conference Hall-ah sawrkar mi pawimawh te hi a kawm a, he hun hi Mamit DC Lalnunhlua chuan kaihruaiin Aspirational District Programme hnuaia hmalakna hrang hrangte chu Aspirational District Programme Nodal Officer Lalsanglura chuan Powerpoint presentation hmangin chipchiar takin a tarlang a. Hmasawnna awmte leh hmachhawp leh tanlakna tur hrang hrangte sawiho zui nghal a ni.

He hunah hian Union Minister Parshottam Rupala chuan Mamit District a rawn tlawhchhan leh inkawmhona neih anih chhan sawiin, Central Schemes hrang hrang District mipuite'n an hlawhtlinpui theih nan leh tha taka kalpui anih leh nih loh thlithlai a, harsatna awm te hrechianga sutkianpui tura kal anih thu a sawi a. District Concern Officers te pawhin Sawrkar hmalakna Programme hrang hrang zirchiang a, beneficiaries te'n an hlawhtlinpui ngei theih nana tan la turin a fuih a ni. Mamit District chu Aspirational District anih angin natna khirhkhan bik inenkawlna atan cheng nuai 5 thleng bill theih turin ruahmanna Central-in a siam a, Mamit District chhungah mi 50,000 thlanchhuah atanga 30,000 te chu dawng tura thlanchhuah an nih tawh thu sawiin, a bak 20,000 pawh hian an hmuh theih nan hmalakpui mek an nih thu a sawi bawk.

PM-Kisan chu Aadhaar Card, ram leh Bank Account nei tan dil theih anih thu pawh Minister chuan sawiin, a concern department te pawhin Mamit District chhunga kuthnathawktute'n he Scheme atanga hlawkna mi tam thei ang berin an dawn theih nana tan la turin a chah a. He inkawmhona-a Sawrkar Officials leh Beneficiaries te'n an harsatna leh mamawh an lo thlente chu a theih ang anga bawhzuisak a tum thu a sawi bawk a ni.

He hunah hian Central Schemes hrang hrang AYUSHMAN BHARAT - Health & Wellness, Ayushman Bharat - Jan Arogya Yojana, e-Transaction, Pradhan Mantri Jan Dhan Yojana (PMJDY), PM Street Vendor's Atma Nirbhar nidhi (PM-Svanidhi), Pradhan Mantri Ujjwala Yojana (PMUY), Pradhan Mantri Awas Yojana (Gramin/Urban), Jal Jeevan Mission (individual household connection & Schools), Swachh Bharat Mission (Urban/Gramin), PMMVY leh PM-Kisan hnuaia Beneficiaries te leh a changtu Officials te kawmna neiin zawhna leh chhanna hun hman zui a ni bawk.