Thenzawl-ah Sial pa chi tha vulh punna tur AH & Vety Minister in a hawng

Thenzawl AH & Vety Farm-a Sial pa chi tha vulh punna hmun tur, Mithun Stud Farm chu nimin khan AH&Vety Minister Dr. K. Beichhua chuan a hawng a, helai hmunah hian Sial 7 dah nghal an ni.


Thenzawl-a Mithun Stud Farm hawnna hunah hian AH & Vety Minister Dr. K. Beichhua chuan tihtak zeta beituten Pathian malsawmna an dawng thin tih sawiin, thawkrimte tana dinchhuahpui theihna tur malsawmna ram tha, sik leh sa nuam tak min petu Pathian hian State rethei leh hnufual bik tura min siam a rinawm loh tih a sawi a, mitinin theihtawp chhuaha mahni zawna hna kan thawh theuh a pawimawh em em a ni, a ti. Sial vulhtuten hlawhtlinna sang tak an hmuh theih nana Se (Sial) pa chi tha vulh punna hmun tur hawn theih a ni ta chu lawmawm a tih thu sawiin, rah duhawm tak a chhuah ngei a rin thu Minister chuan a sawi a. Mithun Stud Farm hawn tak chu sawrkar hmasa in hma a lo lak tan tawh a nih thu sawiin, bul lo tantute chungah lawmthu a sawi a. Mizoram chu sa ei nasa pawl tak kan ni a, mahse sa eitur tharchhuah lamah kan hnufual hle thung si nia sawiin, Sa tharchhuah a lo pun zel theih nan tun tuma an hawn tak Stud Farm hian nasa taka min puih an beisei thu leh Sial vulh hi eizawnna tha tak a ni tih hriaa thalaite pawhin kan uar deuh deuh a tul thu a sawi bawk.

He hunah hian Khualzahawm AH & Vety and Sericulture Board Vice Chairman C. Lalmuanpuia MLA pawhin sawrkar in kan ram chu Sa-a intodelh tir a tum mek thu leh tuna Sial vulhna hawn fel tak pawh hi kan intodelhna tur kawng hawngtu pawimawh a nih a beisei thu a sawi a. Hmanlai ah chuan Sial ngah chu mihausa-a ngaih an ni thin thu leh Vawiin-ah pawh Sial ngah theite chu mi hausa an la tlin thu sawiin, a bul tanna chauh la ni mah se hmasawnna rahbi pawimawh tak a nih avangin lawmawm a tih thu a sawi a, hetiang hmun pawimawh tipuitling tura theihtawp chhuahtu Chief Minister leh AH & Vety Minister chungah lawmthu a sawi bawk.


Mithun Stud Farm hawnna inkhawm hi Mizoram sawrkar-a Secretary (AH & Vety) Lalzarmawii IAS chuan kaihruaiin AH & Vety Director Lalremliana chuan an hmalak dan leh ruahmanna an neih te a sawi a, Se chi tha, a chi thlahtu tur a pa tharchhuaha, Sial vulhtute hnena hlan thin chu he Farm in a tum ber a nih thu leh Mizoram-a kan Sial vulhte hi an nih ang anga kan vulh mai chuan a chi thalo an lo chhuah theih thin avangin a chi tha tharchhuah chu he Farm in a tum ber a nih thu a sawi a ni.

Nimin-a hawn tak Mithun Stud Farm hi NEDP Project hnuaiah cheng vbc. 3 senga sak a ni a, Ran In pathum - a note leh thangla, a pa leh a pui awmna tur te siam hran a ni a, Ran In pakhat ah hian ran 20 bawr vel zel an leng a. Tunah hian a pa pakhat leh a nu 6, thla 10 atanga thla 28 inkara upa a awm mek a, Leng, Khawbel leh Riangtlei atanga lakkhawm te an ni.

Comments

Popular News (Last 30 Days)

LPG man bithliah thar