Serchhip District-ah Green Mizoram Day hmangin kangmei veng tha khua te lawmman hlan an ni

Green Mizoram Day, 2022 chu Mizoram hmundangte rualin Serchhip District-ah pawh nimin khan Thenzawl Golf Course & Resorts Convention Centre-ah hman a ni a, he hun hi Bawrhsap Nazuk Kumar IAS chuan hmanpuiin kangmei venna kawnga thawk tha khua te chawimawina hlan an nih bakah thingtiak thahnem tak phun a ni bawk.

Serchhip District-a Green Mizoram Day puala inkhawm neih ah hian Bawrhsap chuan Green Mizoram Day-ah thingphun te, tuihna humhalh te, ramngaw humhalh thute sawiin kan inzirtir bakah thingtiak te kan phun thin thu sawiin, he ni thiltum hi thil thuk zawk leh ril zawk awma a hriat thu a sawi a, “Chu chu khuarel leilung (nature) nena inrem taka nun hona (live in harmony with nature) hi a ni,” a ti a. “Tui leh boruak thianghlim pawimawh zia hi inhrilh nawn fo a ngai lova, kan nunna hnar pahnih pawimawh em em tui leh boruak thianghlim kan neih theihna hnar chu thing leh mau te hi an ni a. Chuvang chuan kan thing leh mau, kan ramngaw te humhalh hi ngaihthah theih a ni lova, phur taka bawhzui zel tur thil a ni,” tiin Green Mizoram hlawk taka hman a pawimawhzia a sawi a. Hun kal tawha kan thing lo phun tawhte an damkhawchhuah theih nana bei zel tur leh kan fate hnena thingphun pawimawhna zirtir uar deuh deuh turin mipuite chu a chah bawk a ni.

Serchhip District-a Green Mizoram Day puala hun hman hi Thenzawl DFO leh District Committee on Green Mizoram-a Member Secretary Lalbiakchama Chawngthu chuan a kaihruai a, COVID-19 hri leng avangin kum 2 chhung Green Mizoram Day kan hman thin anga kan hman theihloh hnuah kumin ah chuan kan hman thin anga kan hmang leh thei ta chu lawmawm a tih thu a sawi a. Kum 1998-ah 'Green Aizawl Committee' dinin Mizoram ti hring tura beihpuithlak tan a nih thu leh 1999-ah Mizoram huap tura 'Green Mizoram Committee' ti a tihlen a nih thu a sawi bawk.

Serchhip District-a Green Mizoram Day hmanna ah hian 'Impact of Forest on Hydrological Cycle' tih thupui hmangin Dr. Lalhmangaihzuali, Asst. Professor, Dept. of Botany GSC chuan kal-khawmte zirtirna a pe a, thingphun pawimawhna leh mihringte tana a tangkaina te, Serchhip District-ah ramngaw tha a tlem tawh thu bakah tuihna siam tura thingphun a pawimawh thu a sawi a, thing pakhat kan kih in a dang pathum zel kan phun belh chuan kan ramngaw te chhe zel lova awm thei tura ngaih a nih thu a sawi a ni.

He hunah hian kumin Thal laia kawngmei venna kawng hma la tha khua te chawimawina hlan niin State Level atanga thlan ah Lungpho khua chu pakhatna niin thuziak leh Rs. 50,000/- an dawng a, pahnihna Zote South leh pathumna Bungtlang te niin District Level-a thlanchhuah Leng, Piler leh Mualpui Chhingchhip te hnenah chawimawina hlan an ni bawk a. Chanchinbu kangmei ven kawnga titha Lenkawl Daily Newspaper hnenah chawimawina hlan a ni bawk.

He hun hman zawh a nih hnu hian  Vanva lui tuihna humhalhna leh Golf Course ram leilung luangral tur venna atan hmun thlanbik-ah te he huna tel te hian thingtiak an phun nghal a ni.