Serchhip District-a SEDP dawng tura rawt te hming thehluh hun Vawiin-ah tawp dawn

Serchhip District chhunga Village Level SEDP Committee ten an huamchhunga SEDP dawng tura an thlante hming thehluh hun chu Vawiin hian a tawp dawn a, SEDP-ah hian Line Department 9 hnuaiah Trade hrang hrang 69 zet a awm a ni.

Thla hmasa May 23, 2022-a SEDP chungchang zirhona leh inhrilhfiahna Serchhip DC Conference Hall-a neih a nih tuma ruahmanna siam a nih angin Serchhip District chhunga Village Level SEDP Committee hrang hrangte chuan an huamchhung atanga SEDP dawng turte hi an buaipui mek a, heng Village Level SEDP Committee te hnenah hian dilna Form thehluh theih niin anni hian Vawiin June 10, 2022 ralhmain District Level SEDP Committee-ah dilna te hi an thehlut vek anga, heng te hi tun thla ni 15 ralhmain State Level Executive Board-ah thehluh leh tur a ni dawn a ni. Tun tumah hian SEDP dawng tur hi Assembly bial tinah mi 1500 zel thlan an ni dawn a, Village tin te hi an khaw len dan a zirin 1500 atang hian an chan tur siam leh theuh an ni bawk.

SEDP hi Sawrkar Department 9 ten kalpuiin Trade chi hrang 69 zet a awm a, Agriculture Department hnuaiah Vaimim, Bekang, Fu, Oilseed, Dailuah/Chana chin bakah Buh chin (WRC-I&II) te awmin Horticulture Department hnuaiah Bamboo Plantation bakah, Thei leh thlai chin-ah Balhla, Lakhuihthei, Dragon Fruit, Sapthei, Serthlum, Nimbu, Kiwi leh Grape chin te, Thlai-ah Tomato, Zikhlum leh Iskut bakah thlai dang Panhnah, Bawkbawn, Chingit, Thingthupui, Khanghu, Alu, Telhawng leh thildang chin te, Pangpar huan siam te, Ramhmul damdawi chinna kawngah Sunhlu leh Aloe Vera bakah thildang chin te leh Thingpui chin te thlan theih a ni a. AH&Vety Department hnuaiah Vawk, Ar, Bawng, Kel leh Sial vulh te, Fisheries Department hnuaiah Sangha khawi te, Sericulture Department hnuaiah Eri, Muga leh Mulberry chin te thlan theih a ni bawk.

Heng bakah hian Land Resources, Soil & Water Conservation Department hnuaiah Kuhva, Hmunphiah, Rubber leh Coffee chin te thlan theih a ni bawk a, Commerce & Industries Department hnuaiah Trade 23 zet awmin Mistiri hna, Mau leh hnang hmanga thil siam, Steel Fabrication, Aluminium Works, Puantah, Puanthui, Beauty & Welness Therapy, Lumeh, Pangpar lem siam leh khawi, Thirden, Pheikhawk chhe siam, Electronic Repairing, 2 Wheeler Workshop, Automobile Workshop, Puncture/Tyre Works, Computer leh Mobile bakah Internet hmanga eizawnna chi 8 te, Khuai khawi te, Chaw leh eitur dang sawngbawl te, Chhang ur, Thingpui dawr siam, Eichawp dawr siam, Kuthnathawkte hman tur khawl lei leh Micro Enterprise leh Petty Trade te a awm a. UD&PA Department hnuaiah Leitha siam, Hluihlawn thil atanga thil tangkai siam, khawlai tihfai leh bawlhhlawh khawnkhawm baka kawngsir-a dawr siam te thlan theih awmin Tourism Department hnuaiah Tourist Guide/Tour Operation te a awm bawk a ni.

Comments

Popular News (Last 30 Days)

LPG man bithliah thar