Ruahsur nasa avangin Serchhip leh a chhehvel ah chhiatna thleng awmin In pakhat thiah a ni dawn

Kar hmasa Nilaini chawhnu lam atanga ruahsur nasa in Serchhip khawpui leh a chhehvel ah chhiatna chi hrang hrang thlen mah se mihring nunna leh chenna In channa khawpa chhiatna liantham thleng erawh a awm lo thung.

Nilaini chawhnu atanga nimin thlenga ruahsur avang hian Serchhip khawpui chhungah leimin a awm nual a, Serchhip IOC Veng leh P&E Veng inkalpawhna Soil Peng bulah Inrinni khan leimin in kawng hnawhin hemi zan hian PWD ten an thian nghal a, IOC Veng Quarry Road-ah leimin in hmun thum-ah kawng hnawhin PWD hian lirthei kal theihna turin an thian nghal a, Quarry Road-a leimin hian nimin zing khan kawngchhak lama Engzauva te Car dah chu a chhilh a, vanneihthlak takin Car hi a chhe nasa lo hlauh thung a ni. Serchhip khawpui chhung NH. 54-ah hmun 5 velah leimin awmin kawng hnawh liantham a awm lova, kum 2019-a Serchhip Saron Veng leimin avanga chenna In engemaw zat lo chhiat tawhna chu che lehin Serchhip Dinthar Veng, Tumbawk lui atanga Dinthar Vengsang panna kawng chu a hnawh a, nimin khan thenfai hna thawh nghal ni mah se lei hi che thei reng dinhmunah a la ding a, hei vang hian a bula cheng thenkhat te chuan nimin khan an bungrua an thiarchhuak a, Dinthar Veng Uitalh lui atanga Dinthar Vengsang panna kawng pawh leimin hian a hnawh bawk.

Serchhip Sailiam Veng-a Tower bunna tur kawng laihna leivung tawlh in a thlanglam, NH. 54 kawngchhuak lama Chhanghnuna In chu a rawn chim avangin Inrinni khan a bungrua te hi thiarchhuah a ni a, bungrua thiarchhuah a nih lai hian In chhungah hian leivung thahnem tak lut tawhin a In chhuat (lei) hi a lai-ah a khi tlang bawk a, nimin-a Darnam Veng VC leh YMA te thukhawm chuan Vawiin hian In thiah hnatlang neih nise an ti a. Helai vel hi kum 2018 khan lo che tawhin a bul lawka Darengi te In chu leimin vang hian a lo tlu tawh bawk a ni. Helai Tower phunna tur kawng laih pen tanna, Rora chhutna kawr bula chhungkaw pakhat pawhin an In hi an chhuahsan rih bawk a ni.

Serchhip khawpui chhung NH. 54 laihzauh leh siamthat hna thawh mekah Chhiahtlang Kawn Veng atanga by-pass siam meka kawngthlang lam dawlna tura lungrem chu nimin khan a chim a, mihring tawrhna lian thleng lovin hmundang ah Retaining Wall chhia pawh a awm nual a. Serchhip Mat lui pawh nasa taka lianin leilet a chim nual a, Leilet siam turte Buh chi kui pawh nasa taka a tihchhiat rin a ni a, hei bakah hian Vaivenga Zau-a Lei dawh pawh a chhe tawh nia thudawn ni bawkin tuilian avangin chanchin kimchang hriat theih ala ni rih lo thung.