PHE Sr. EE in Training buatsaih hawnna a nei

PHE Serchhip WATSAN Division-a Sr. EE, Er. F. Lalsanglura chuan khaw hrang hranga WATSAN Committee leh Department in thawhhona tha tak an neih zel avangin Serchhip District chu Mizoram-ah tui hnianghnar ber te zinga mi a nih thu a sawi.

Ni 2 awh tur ‘District Level Training for Village Functionaries & follow up Programme of Community Mobilization Activities’ hawnna inkhawm nimin-a SIRD Conference Hall, Tarpi tlang-a neih a hmanpuina ah he thu hi sawiin Er. F. Lalsanglura chuan, Jal Jeevan Mission hnuaiah tuilakna tur kan la hmuh zel thu a sawi a,, heng hi tangkai taka kan hman a tul a ni, a ti a. WATSAN Committee leh Department in thawhhona tha tak an neih zel avangin Serchhip District chu Mizoram-ah tui hnianghnar ber te zing a mi a nih thu sawiin, mipui ten tui in tur thianghlim, quality tha an neih chu sawrkar in a ngaih pawimawh thu a sawi a, mipuite in tur tui enfiahna Laboratory chu Serchhip District-a District Hqrs. ah pakhat a awm thu leh Sub-Division pahnih ah te pawh a awm thu a sawi a, heng Laboratory-ah te hian tui in tur endik tir fo thin a pawimawh thu a sawi bawk.

Serchhip District chhungah Tui hna humhalh kawnga hma an lak that avangin National Award hial dawng thei an awm thu pawh Se. EE chuan sawiin, hei hi thil ropui tak a nih thu a sawi a, hetiang an dawn theihna chhan pawh hi thawhhona that vang a ni tih a sawi a, an thawh-rimna zarah ODF leh JJM Movement pawh tluang taka a kal zel thu a sawi bawk.

PHE Department Serchhip WATSAN Division leh Project Management Unit, JJM ten an buatsaih training hawnna hi PHE Serchhip-a Sr. SDO Er. Samuel LR. Ralte chuan kaihruaiin Serchhip District chhunga WATSAN Committee te bakah Implementation Support Agency Team aiawhte an tel a, mithiam hrang hrang ten thupui thlanbik hmangin zirtirna an pe a ni.