COVID-19 kai 4 hmuh belh

Nimin khan Serchhip District-ah COVID-19 hri kai mi  4 hmuhchhuah niin hri kai zingah mi 3 te enkawl dam an ni thung.

Nimin a Serchhip District-a COVID-19 hri kai hmuhchhuah belh te hi North Vanlaiphai khua a hri kai hmuh te vek an ni a, District chhung khaw dang-a Sample enfiah zingah hri kai hmuh an awm lo thung a ni. Hetihlai hian nimin khan Serchhip District-ah COVID-19 hri kai enkawl dam mi 3 an awm a, heng te hi Serchhip, Thenzawl leh Thentlang khuaa mi pakhat theuh an ni.

Heti hian nimin thlenga Serchhip District-a COVID-19 hri kai hmuhchhuah tawh zawng zawng chu 13,998 niin an zinga 13,948 te chu enkawl dam an ni tawh a, hri kai hmuh tawh atanga chhutin za zela 99.64 te chu enkawl dam ni tawhin hri kai enkawllai mi 15 lai an la awm a, hri kai zingah mi 35 an boral tawh bawk a ni.

Tun dinhmuna Serchhip District-a CO-VID-19 hri kai enkawllai la awm te hi khaw 6 a mi te an ni a, Thenzawl-ah hri kai enkawllai mi 7 la awmin North Vanlaiphai-ah mi 4 an la awm a, Serchhip, Zote South, Bungtlang leh Khawlai-lung-ah mi pakhat theuh an la awm bawk a ni.