NHIDCL hotute thusawi a hmuna enfiahpui ah cho

Youth for Environment Justice Mizoram (YEJM) chuan NHIDCL Executive Director, Virendra Jakhar chu DDK Mizoram kaltlanga Mizo mipui dawt hrilh ah puhin, a cho ang ngeia a thusawi te finfiahpui ah an cho let thu an sawi bawk.

YEJM te hian nimin khan Aizawl Press Club ah thuthar thehdarhtute kawmin National Highway Infrastructure Development Corporation Limited (NHIDCL)-in Mizoram hmun hrang hranga kawng an laihin a tihchhiat belh nasat thu leh siamthata tuamdam leh a nih theih nan theihtawp chhuaha hma an lak dan te sawiin, May 27-a Mizoram sawrkar-a Principal Chief Conservator Forrest (PCCF) hnena NHIDCL hnathawh lai zawng zawng Stay Order pe a, environment an tihchhiat tawh siamthat (restore) tir tura phutna lehkha an pek thu te an sawi a. Hei bawhzui hian DFO thenkhat te pawhin Stay Order hi an tihchhuah nghal thu an sawi a.

Hemi hnu hian NHIDCL hnathawh an thlithlai reng dawn thu an sawi angin, NH-54 leh NH-06-ah an hnathawhte enzuiin NHIDCL te hian hmun thenkhatah an hnathawh chhunzawm luiin an leivung pawh kan luiah an la paih zel tih an hmuh thu leh Environment humhalhna dante leh ram leilung fate min zah lohzia an lantir zel nia sawiin, “Kawng an laih dawna tih ngei ngei ngai Environment Impact Assessment (EIA) pawh pakhat mah an la zawm lo zui zel a ni,” an ti a. Hetihlai hian NHIDCL Executive Director, Virendra Jakhar chuan June 7, 2022 khan DDK Mizoram palai hnenah an kawng laihvung thehthang chungchangah dan lo-a engmah an tih loh thu leh leivung paih lohna tura an paih loh thu a hrilh nia sawiin, dawt ngialngan sawi ah an puh a. “Chuvangin heng- NH-54, NH-06, NH, 102B leh NH-302 ah hian dan lo anga an leivung paih en ho tura kalpui turin kan inpeih a. Lo inpeih ve nghal rawh se,” an ti a. “Virendra Jakhar-in DDK Mizoram hnenah Forest department hotute nena enho a huam ang hian EF&CC hotute hian enpui ngei rawh se,” an ti bawk.

Hei bakah hian Virendra Jakhar chuan DDK palai hnenah Fur laiin lui chu a nu thin a, thil danglam a nih loh thu a hrilh bawk nia sawiin, “Fur laia kan lui tui nu satliah leh leivung thli leh chirh dumin a tih nut hi mi pangngai tan chuan hriat hran loh chi a nilo. A finfiahna video clip kan nei bawk a ni,” tiin “NHIDCL kawng laihna hmun- 99.9% ah kan lui kawr leh luite te an kawng laih vungin a chhilh vek avangin ruahsur-ah an kawng laih vung chirha chang ta chu kan lui lianah a luanglut a. Kan lui liante chu leivung leh bawlhhlawh (siltation)-a a khah avangin kan lui tuite hman tlak lohin a nut phah tih a hmuna en pui tur kan inpeih a. Kan en ho ngei tur a ni,” tiin DC te phalna a paih anga a insawi pawh DC te hian phalna an pe a nih chuan a mawh an phur tur a ni ang, an ti bawk.

Comments

Popular News (Last 30 Days)

LPG man bithliah thar