Mizoram State Health Care Scheme ba rulhna tur sum Sawrkai Laipuiin a pawmpui

Health Minister Dr. R. Lalthangliana chuan Mizoram State Health Care Scheme ba rulhna tur sum Sawrkai Laipuiin a pawmpui thu a sawi.

World Blood Donor’s Day puala inkhawm nimin-a Aijal Club-a neih ah Health Minister chuan Mizoram State Health Care Scheme chu Mizoram mipui a tam thei ang berin an chhawr tangkai theih nan sawrkarin ruahmanna a siam a, amaherawhchu budget-a ruahman lawk hauh loh khuarel chhiatna hrang hrangah sawrkar sum tam tak a luanral tak avangin sum lamah sawrkar a pachhe hle a; Health Care ba tam tak a inkhawl hman tawh tih a sawi a. Health Care pawisa petu Finance Department lamin harsatna an tawk a, a rulhna turin Asian Development Bank-ah Soft Loan cheng vbc. 1000 dil niin hei hi Central Sawrkar rulhpui tura dil a nih thu  a sawi. Hetihlai hian Sawrkar Laipuiin sum lama harsatna a tawh ve mek bawk avangin Ministry of Finance hnuaia Department of Expenditure chuan State sawrkarin rul mai se tih rawtna a siam a. Mizoram Sawrkar hotulut en vawi tam tak Sawrkar Laipui thuneitute an dawr hnuah nizan hmasa khan Finance Ministry Screening Committee chuan Mizoram atanga rawtna an thlen chu an pawmpui tak thu an rawn hrilh tih a sawi a ni.

Health Minister chuan mihring dam chhung tawite ah midangte tana inpekna tluka hlu leh ropui a awm lo tih swiin, Pathian in Mizote thinlungah mahni mihringpuite hmangaihna, mi dangte lainatna leh duhsakna a dah a, chumi lanchhuahna pawimawh ber te zinga mi chu mamawhtute tana a thlawna thisen pek, Voluntary Blood Donation hi a ni, a ti a. Mahni tana hlawkna um lova damlo mangangte tana an din tlat avangin a thlawna thisen petute a fak a. Association for Voluntary Blood Donation (ABVD) te hmalakna ropui a tih thu sawiin, a thlawna thisen pekin 100% a kai theih nan tan la chhunzawm zel turin a fuih a ni.

He huna tarlan a nih danin kum kalta 2021-2022 chhung khan Mizoram Blood Bank hrang hrangte thisen lakkhawm chu Unit 28,191 niin heng zinga Unit 25,396 chu mi tlawmngai ten a thlawna an pek a ni a, hei hi thisen pek zawng zawng atanga chhutin za zela 90.08 niin hemi chhung hian Blood Donation Camp tum 480 neih a ni bawk.

Mizoram chhungah vawi 50 chuang thisen pe tawh mi 27 an awm a, mimal-a Thisen pe hnem ber te chu C. Lalremruata Electric Veng leh RC. Rokhuma Mission Veng te niin tum 83 ve ve an pe tawh bawk a ni. Nimin-a he hun hmanna ah hian pawl hrang hrang thisen pe tam te hnenah chawimawina hlan niin pawl hminga thisen pe tam ber chawi-mawina chu Central KTP (3968) hnenah hlan a ni bawk.