NEC Secretary in Bukvannei-a Oil Palm herna a tlawh

North Eastern Council (NEC) Secretary K. Moses Chalai IAS chuan nimin zing khan Kolasib District Bukvannei-a Godrej Agrovet Ltd. Palm Oil Factory chu a hmunah a tlawh.

Nimin-a helai hmun tlawhtu NEC Secretary hi Godrej Agrovet Ltd. Executive-Extension Officer Lalruatkima chuan an hnathawh dan te a lo hrilh a, NEC Secretary chuan Sawrkar hmalakna kalpui kawngah Mizoram chu hmarchhak State dangte nen khaikhin chuan a titha pawl an nih a rin thu a sawi a, Mizo thalaite leh tunlai thiamna hmuhchhuah thar ang angte chu hmasawnna hna thawhna kawngah hman tangkai thiam a pawimawh thu a sawi bawk.

Kolasib District chhunga Oil Palm rah tharchhuah atanga za zela 20 bawr vel chu inkalpawhna harsat avangin Palm Oil Factory a thlen thin loh thu thawktuten an tarlan angin NEC Secretary chuan DC Office, Kolasib leh Godrej Agrovet Ltd. Palm Oil Factory-te tangkawp a mumal tak a zirchianna kalpui turin leh chung harsatna sutkian a nih theih nan ruahmanna felfai tak siam turin a chah a. State thenkhatah chuan Oil Palm herna fe chu Sangha leh ran chaw siam nana hmanraw tangkai tak a nih thu .Moses Chalai chuan sawiin, Palm Oil Factory pawh chutiang tura ruahmanna siam turin a chah bawk a ni.

Godrej Agrovet Ltd. Executive-Extension Officer Lalruatkima tarlan danin October ni 28, 2014 khan Palm Oil Factory, Bukvannei hi hawn a ni a, tunah hian Oil Palm chingtu mi 600 bawr velin 1,300 Hectare-a zau Oil Plam chinna hmun an enkawl a ni. Kum 2021-22 chhung khan Oil Plam rah kg khat Rs. 5.50 a leiin Kolasib District-ah Metric Ton 1600 an lei thu a sawi a, April 2022 atang khan an leina man hi tisangin kg khat ah Rs. 10 a nih tawh thu a sawi.