National Family Benefit Scheme (NFBS) hnuaia Serchhip District-a tanpuina dawng tur thlan an ni

Chhungkua a eizawngtu ber a boral avanga an kalsan an chhungte hnena tanpuina pek theihna Scheme, National Family Benefit Scheme (NFBS) hnuaia Serchhip District atanga dilna lut te enfelin nimin khan Serchhip-ah NFBS Selection Board chu thukhawmin tanpuina dawng tur mi 30 thlanchhuah an ni.


National Family Benefit Scheme (NFBS) Selection Board thutkhawm nimin-a Serchhip DC Meeting Hall-a neih hi Serchhip Addl. DC Lalmuansanga Ralte chuan kaihruaiin Member Secretary leh Serchhip bialtu District Social Welfare Officer, Aizawl East F. Lalngaihawmi chuan he thutkhawm koh a nih chhan te a sawifiah a. NFBS hnuaiah hian BPL chhungkua, an chhungkua a eizawngtu ber a boral a nih chuan a chawm, a nu emaw, nupui emaw leh a fa te emaw in sawrkar ah tanpuina Rs. 20,000/- dil theih a nih thu leh BPL List hi mumal taka a awm loh avangin Supply Department in Ration Card an pekchhuah ah PHH leh AAY Card nei te chu pawm an ni tih a sawi a. Amaherawh chu tanpuina diltu leh an chhungkaw chawmtu ber hi Ration Card pakhat-a hming chuang an ni tur tih sawiin, mi thenkhat ten dilna thehluhna tur hmun ah harsatna an neih thin avangin Serchhip District tan Serchhip leh East Lungdar ICDS Project-a CDPO te hnenah thehluh theih tura ruahmanna siam a ni tih a sawi a. Tanpuina hi Bank Account kaltlanga pek thin a nih avangin a diltu chuan Bank Account thehluh tel a tul thu leh India khua leh tui dik tak an ni ngei tih finfiahna, Ration Card, Adhaar Card leh Voter ID te thiltel a tul thu a sawi a. Chhungkuaa eizawngtu ber boral fate chu kumtlinglo an ni tur a nih bakah khawtlang pawhin he tanpuina hi dawng tlaka an ngaih te an ni ngei tur a ni tih a sawi bawk a, he tanpuina hi mi pakhat in tum khat bak dawn theih a nih loh thu leh kumtin semchhuah thin a nih thu a sawi bawk a ni.

Sawrkar kum liamta, 2021-2022 atan Serchhip District atangin NFBS atang hian mi 30 te tanpuina pek theih niin dilna lut 41 a awm a, heng te hi District chhung khaw hrang hrang khaw 12 atanga lut niin heng te hi an dinhmun hrang hrangte zirchian a nih hnuah tanpuina dawng tur mi 30 hi thlanchhuah an ni a, heng te hi Serchhip atangin mi 8, Thenzawl atangin 6, East Lungdar atangin mi 3, Chhiahtlang, Keitum North Vanlaiphai leh Lungkawlh atangin mi 2 theuh leh Chhingchhip, Bungtlang, Khumtung, Leng leh Sailulak atangin mi pakhat theuh an ni.

He thutkhawm ah hian Serchhip bialtu MLA Lalduhoma bakah DLAO F. Lalnisai leh ICDS aiawhte bakah YMA leh MHIP aiawhte an tel a, Serchhip bialtu MLA chuan Serchhip-ah District Social Welfare Officer (DSWO) Office ala awm loh avanga harsatna thleng thin te sawilangin, tunhma lama Lunglei District atanga enkawl thin chu Mizoram Upa Pawl ten harsatna an thlen angin tih danglam a nih tak thu a sawi a, thawktu dah thuai a tul thu a sawi bawk a ni.

Comments

Popular posts from this blog