MPSC Chairman lakluh a ni

Mizoram Public Service Commission (MP-SC) Chairman thar atan JC. Ramthanga IAS (Rtd) chu nimin khan Mizoram Governor Hari Babu Kambhampati chuan Raj Bhavan Durbar Hall-ah rinawmna thu tiam tirin a lalut a, he hun hi Chief Secretary Renu Sharma chuan kaihruaiin he hunah hian Chief Minister Zoramthanga, Assembly Speaker Lalrinliana Sailo, Dy. Chief Minister Tawnluia, Cabinet Minister te, Minister te, MLA te, Official te leh sawmbik mi thenkhat te an tel a ni. JC. Ramthanga hi J. Kailova leh Lalzopuii te fa 8 zinga mi niin May 7, 1962 khan a piang a, lehkha thiam thei tak niin Civil Services pathum - Armed Forces Hqrs. Civil Service (AFHCS), Indian Police Service (IPS) leh Indian Administrative Service (IAS) ah a tling vek a, August 21, 1989 khan Indian Administrative Service (IAS) zawmin IAS a kaisan theihna sang ber Apex Scale (Additional Chief Secretary) thlenga a kai-san hnuah tunhnai khan a pension ta a ni.