MPCC ten thudik lo sawi ah Chief Minister puhin thupha chawi tura an phut thu an sawi

Mizoram Pradesh Congress Committee (MPCC) chuan Chief Minister in Mizoram Health Care Scheme atan Congress Party in kum 10 chhungin cheng khat mah an dah lo ang a a sawi chu thu diklo, mipui bumna leh dawt thu hmanga Congress Party tihmualpho tumna nia sawiin, tun thla chhung ngeia thupha chawi turin an phut.

Nimin-a Aizawl Press Club-a thuthar thehdarhtute an kawmah Congress Party thupuangtu Dr Lallianchhunga chuan, June 10-a Federation of Samagra Employee khawmpui Vanapa Hall-a a hmanpuinaah Chief Minister Zoramthang hian, 'Mizoram State Health Care Scheme (MSHCS) atan Congress Party in kum 10 sawrkarna an chan chhungin cheng khat mah an dah lo a, kan awm loh chhungin cheng khat mah dah belh a awm lo' tia a sawi chu thu belhchian dawl lo, dawt chiang tak hmanga mipui bum tumna leh dawt thu hmanga Congress party tihmualpho tumna a nih thu a sawi a. Finance Department in RTI an chhanna atanga a lan danin, MSHC sum bawmpui Corpus Fund hi Congress sawrkar lai, March 30, 2010-a dah tan a nih thu leh a tirah cheng vbc. 117.80 dah niin, dah belh zel a ni tiin, “Congress sawrkar kum tawp, Dec. 2018 thleng khan Health Care Corpus Fund-ah hian Rs. 155,56,71,000 a awm hman hial a ni,” a ti a. Heng zawng zawng hi Congress sawrkar hunlaia dah vek a nih thu leh a pung hmang hian Congress Ministry liamta khan tha takin Health Care hnuaia dam lo Bill a pe thin tih a sawi bawk.

Dr. Lallianchhunga hian Congress sawrkar laiin damlo bill pek theih loh a awm ngai loh thu pawh sawiin, MNF sawrkar hnu kum thum emaw lek chhung hian Bill pek theihloh cheng nuai tam tak a inkhawl khawm tawh tih a sawi a. “Kumin April thleng khan Bill pek theih loh hi cheng nuai 7121 a tling tawh a. Damlo Bill an pek theihloh avanga mipui ah ngaihdam dil mawlh mawlh tur an nih lai a, an chet chhiatna thup nana dawt an la sawi kual duh hi hriatthiam theih a ni lo,” tiin, Chief Minister chu thupha chawi tura an phut thu a sawi a. June thla chhunga thupha a chawi lo a nih chuan na taka hma an lak chhun-zawm tur thu a sawi bawk.

Mzioram Pradesh Congress Committee (MPCC) hruaitute hian nimin-a thuthar la-khawmtute an kawm zawh hian Chief Minister Zoramthanga hnenah thupha chawi tura an phutna lehkha pawh an pe nghal a ni.