Tlungvel Higher Secondary School chuan kumin a Higher Secondary School Leaving Certificate (HSSLC) Exam result chhuaka an zirlai Exam zawng zawngin an pass vek lawmna chu Inrinni khan neiin he hun hi bialtu MLA leh Deputy Speaker Er. Lalrinawma chuan a hmanpui a, Tlungvel HSS thawktute leh zirlai hlawhtling thar zawng zawngte a lawmpui thu sawiin, an kal zelna turah duhsakna a hlan a. Zirna pawmawh zia hriaa hma lam pan zel tura fuihin, nungchang uluk tur leh zirlai tih atana mawi leh mawi lo thliar hrang thiam turte, tum mumal nei tur leh a ti hlawhtling tura bei sauh sauh turin a fuih a ni.
He hun hi School Managing Board Vice Chairman V. Lalmuana chuan kaihruaiin Asst. Secretary H. Lalsawmkima chuan report a pek bakah an Chairman leh VCP H. Lalhmunliana pawhin thu a sawi a ni. Tlungvel Higher Secondary School hian an din tirh atangin HSSLC Exam vawi 12 hmachhawn tawhin, 100% pass result hi tum riat an nei tawh a, kumdang ah pawh 90% aia sang an la neih ziah bawk a ni.
Comments
Post a Comment