Mizoram-ah COVID-19 hri kai pung leh hret

Tunhnaiah Mizoram-a COVID-19 hri kai hmuhchhuah pung leh hretin niminpiah khan Sample enfiah 235 atangin COVID-19 hri kai mi 34 lai hmuhchhuah leh an ni a, Sample enfiah atanga chhut pawhin za zela 14.47 zetin hri an kai a ni.

Niminpiah khan Rapid Antigen Test hmangin Mizoram-ah Sample 196 enfiah niin heng atang hian COVID-19 hri kai mi 27 hmuh an ni a, Saitual District-ah 14, Aizawl District-ah 8, Mamit District-ah 5 leh Khawzawl District-ah mi 2 te an ni a. Heng bakah hian ZMC-a RT-PCR Laboratory-ah Sample 14 enfiah niin hri kai mi 5 lai hmuhchhuah an awm leh bawk a ni.

Nimin khan Mizoram-ah COVID-19 hri kai enkawl dam mi 21 an awm belh leh a, heti hian nimin tlai thleng khan Mizoram-a COVID-19 hri kai hmuhchhuah tawh zawng zawng chu 2,28,512 niin an zinga 2,27,692 te chu enkawl dam an ni tawh a, hri kai hmuhchhuah atanga chhutin za zela 99.64 te chu enkawl dam an ni tawh a, hri kai enkawllai pawh mi 120 lai an awm leh tawh bakah hri kai zingah mi 700 an boral tawh bawk a ni.