YMA in SRS din leh turin ngaihtuahna la seng lo

Central YMA President R. Lalngheta chuan Central YMA hnuaia ruihhlo dotu, Supply Reduction Service (SRS) din leh turin ngaihtuahna an la hmang lo tih a sawi.

Central YMA President chuan SRS din chungchang chu Committee thu thu a ni tih sawiin, tun thleng chuan SRS din leh turin ruahmanna siam a la nih loh thu leh Committee a sawihona pawh an la neih loh thu a sawi a. SRS hmalak tawhna te thlirletin, SRS chu ruihhlo hluar zel tur venna leh dona kawngah a thawhhlawk nia an hriat thu a sawi thung. 

Zawhna chhangin Central YMA President chuan Social Media lama SRS din a tulloh thu te, SRS sawiselna leh deusawhna rawngkai tam tak hmuh leh chhiar tur awm thin chuan an member tam takte tha a tizuai tih sawiin, chungte vang chuan an Member te chuan SRS din an chak lo nia a hriat thu a sawi a. “SRS din a, SRS anga ruihhlo do a ke pen hi thil chakawm leh nuam a ni miah lo a, mahse chak hmuh a min hmu tlat an awm thin a, chungte chuan kan member te ah phur lohna a thlen niin ka hria, hmaichhan a min hrilh pawh an awm nual,” a ti bawk.

Hetihlai hian Assam Rifle in June 7, 2022-a 'Anti Drug Awareness Campaign' hawnna an neih a hmanpuina ah Home Minister Lalcham-liana chuan, Central YMA ten SRS dina ruihhlo do beihpui an thlak kha a hlawk thu leh, CYMA leh SRS in ruihhlo an dona ang kha tunah hian Mizoram in a mamawh hlea a hriat thu a sawi a ni.

Central YMA hnuaia ruihhlo dotu SRS hi kum 2010 hmalam atang khan bultan niin, hun bituk (term) chhung zel siamin hma an la thin a, Batch 10 emaw vel thleng an indin hman ni a hriat a ni. A tlangpuiin, Aizawl khawpui chhung YMA Branch hrang hrang atangin member 50 bawr vel inruatin, ruihhlo do hna ngawrh takin an thawk thin a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar