JAC on Serchhip District Hospital Site dinin a hmun ngaiah District Hospital sak thuai an duh

Serchhip-a mi thahnem ngai thenkhat te chu Inrinni tlai khan Serchhip Kawnpui VC Hall-ah kalkhawmin JAC on Serchhip District Hospital Site an din.

He huna kalkhawmte hian Serchhip District Hospital sa tura hmalakna kal mek hrang hrangte thlirin chhang hrang hrangte bakah mipui tam zawk te tana pan awlsam leh tuna ruahmanna awmsa angin District Hospital awmna hmun ngaiah hian Building thar sak thuai an mamawh tawh thu te an sawi a. Hemi atana hma la zui turin JAC on Serchhip District Hospital Site dinin, Chairman-ah Kapliana Pachuau (Bazar Veng), Vice Chairman-ah Lalzuiliana (Bazar Veng), Secretary-ah Lalbiakdika (Bazar Veng), Joint Secretary-ah PC. Vanlalvuana (Hmar Veng), C. Lalrintluanga (Ramthlun Veng) leh Lalhlimpuia (Kanan Veng), Treasurer-ah Lalmuanpuii (Bazar Veng) leh Fin. Secretary-ah H. Lalbiakzauvi (Bazar Veng) te ruat an ni. JAC on Serchhip District Hospital Site hian Serchhip District Hospital Building thar, a hmun ngaia sak tura Mizoram sawrkar in a ruahman chu kaltlangpui a nih ngei theihnan a tawp thlenga hmalak nise an ti a ni.

JAC on Serchhip District Hospital Site hian nimin khan thuchhuah siam nghalin Serchhip District mipuiin tangkai taka an hman mek Serchhip District Hospital Building thar cheng vbc. 21 hmanga sak a ni tur chu lawmawm an tih thu leh he sum hi a hmun ngaia Hospita Building hlui, a thara sakna tura dilchhuah nia sawiin, Health Department in ruahmanna an lo siam tawh angin a hmun ngaiah hian sak tan thuai nise an tih thu an tarlang a. Hospital Building thar sakna atana NGO Coordination Committee ten hmathlir thui tak nei chunga Bukpui an duhna chu an hriatthiampui thu pawh tarlangin, Hospital in a kentel thil tam tak te atan cheng vbc. 30 lai a ngaih tur thu Health Department thuneitu ten an sawi nia tarlangin, “Kan State sawrkar hi Covid leh thildang vangin sum a harsa ve em em mai a, hetiang sum zozai hi min pek theih a beiseiawm lova. Chuvang chuan Bukpui daiah Hospital Building tha tak, hman hleih theih lohvin a ding tawl mai mai ang tih a hlauhawm,” tiin Hospital Building thar hi a hmun ngaiah hian sak thuai ni thei se an duh thu an tarlang a. Heng an duhna te hi sawrkar mi pawimawh te sawipui turin naktuk khian Aizawl lamah lamkal intirh an tum niin an sawi bawk.

Comments

Popular News (Last 30 Days)

LPG man bithliah thar