Congress Thalai ten Healthcare chungchang sawifiah turin Chief Minister an phut

Congress Thalaite chuan Healthcare Bill chungchang tifel a, thudik puangchhuak tura phutna lehkha nimin khan Chief Mnister Zoramthanga pek an tum a, Police-ten Chief Minister's Office Gate pawnah an lo dan avangin hun engemaw chen Police nen an innawr buai a, an lehkha thehluh tur hi Chief Minister Office-ah an thehlut zui a ni.

Congress Thalai hian Chief Mnister lehkha pek an tum hi amah ngei pek a duh thu an sawi laiin, Police hotute leh CM Office lam chuan a Secretary pe mai turin an ngen a, hei hi Congress Thalai lam chuan an duh loh avangin Police te nen hian engemawchen an innawr a. Hemi hnu hian Congress Thalai hruaitu leh Congress Party hotu thenkhante Chief Minister's Office huamchhungah hian luhtir an ni a. Chief Minister hian inleng a neih thu leh hmuh a rem loh thu CM Secretray K Lalthawmmawia chuan pawnah a lo hrih hnuah Congress Thalai Hqrs. President Dr Lalmalsawma Nghaka chuan CM Secretray hi Chief Minister lehkha pek an tum hi a pe a. Chief Minister hmu tur hian Appointment siam nghalin, hmaichhana hmuh leh ngei an tum thu a sawi a ni.

Chief Minister-in Congress Thalai a hmu ngam lo chu mak a tih thu Dr Lalmalsawma hian sawiin, “Buaina siam tura kal kan ni lo a, mipui thlavang hauh duhna avang chauha pen chhuak kan ni a. Mipui thlavang hauh tur hian tun lo pawh hi kan la pen chhuak dawn chauh a ni,” tiin, Chief Minister chu dawt sawi nasa luttukah mipuiin kan ngai titih chu lungchhiat thlak a tih thu a sawi bawk.

Congress Thalaite hian July 20, 2022 hmain Health Care sum tlingkhawm leh a pung zawng zawng zat belhkhawm mipui hmaa puanzar te; Damlo bill ba zawng zawng release te; Chhung tina damlo apiang tana cheng nuai 2 tleng hman theih tura SEDP-a sum dah vek tawh kha khawiah nge a awm a, engzatnge dah anih mipui hriata puan-zar te; An sawrkar hmasak anga Health Care sum mimal hlawkpui tura bank-a an dah leh dah loh sawi chian leh Congress sawrkar hmasa sum lo dah vbc. 122.39 chuang sawi hnawm a, cheng khat mah dah lo anga Chief Minister in a sawi kher nachhan te Chief Minister in a sawifiah phutin, mipui thlavang hauhin ke an pen zel dawn tih an sawi bawk a ni.