Consumer ten an lungawilohna hrang hrangte Online hmanga an complain theihna tur hawn a ni

Consumer ten an lungawilohna hrang hrangte Online hmanga an complain theihna tur web portal ‘e-Daakhil’, edaakhil.nic.in chu nimin khan Supply Minister K. Lalrinliana chuan a hawng.

Supply Minister Pisa-a he Web Portal hawnna hunah hian Minister K. Lalrinliana chuan Consumer ten an thil lei leh dawn ah lungawilohna an neih changa awlsam taka an thlen theihna tur web portal hman theiha ruahman a ni chu lawmawm a tih thu a sawi a, consumer te chanvo humhalh nan tangkai taka hman theih turin hman nuam taka siam a nih thu leh Smart Phone nei tan pawh an Mobile Phone atangin awlsam takin complain an thehlut theih tawh dawn thu a sawi a. Online-a complain thehluh theihna hi kum 2020 kumtawp lam atang khan Sawrkarin a buaipui tan tawh tih sawiin, COVID-19 te leh rokhawlhna dang dang a lo awm ve avangin a puitling lawk thei lova, nimahsela theihtawp chhuah a nih hnuah a lo puitling ve ta a ni, a ti.

He web portal hlawhtlinna atan hian State Bank of India nen MoU sign a nih thu sawiin Minister chuan, SBI Guwahati-ah MoU hi an thehlut a, Guwahati lam hian SBI Corporate Centre Mumbai-ah an thawn thla ve leh a. Mumbai lam hian Merchant User ID leh Merchant Key a lo generate ve leh ta a. Merchant key leh User ID te hi Govt. Of India a E-Daakhil Team te hnenah pe ve lehin anni hian pawisa pekna kawng, Payment gateway kha a tlang tha em, Complaint Fee kha a luhna tur hmunah a lut thei em tih an han endik ve leh a. Chumi hnuah chauh chuan he online system hi hman theihin a lo awm ta a ni, a ti.

Consumer te zingah complain tur nei te chuan he portal edaakhil.nic.in ah hian luta in registerin an complain a thehluh theih a, Complain thehluh hi Consumer Commission lam tan pawh bawhzui zung theih tura duan a ni bawk. Consumer Commission a thubuai thehluh te lo chingfel tur hian President leh Member te District tinah lak an ni tawh a, State Commission-ah hian President leh Member pali neiin an awm a, District Commission-ah hian President leh Member pahnih neiin an awm bawk a ni.

State Commission hian a din tirh atangin case 253 dawng tawhin, case 237 an chingfel tawh a, chinfel hmabak 16 an nei a, District Commission-ah chuan District zawng zawng khaikhawmin, a din tirh atangin case 4388 dawn a ni tawh a, heng zinga case 4354 hi chinfel tawh niin, pending case hi 37 a awm mek a ni. Pending neih mekna hi Aizawl district-ah chauh niin Online a complaint thehluh hi mipuiin an hman tangkai thiam chuan District hrang hrangah te hian Consumer Case hi a pung chho tura ngaih a ni.

E-Daakhil hi CSC te nen thlunzawm tawh a nih avangin hmun kilkhawra awmte tan pawh CSC kaltlang hian complaint a theluh theih dawn a, Consumer in a thubuai neih hlut zawng atanga chhutin cheng nuai nga hnuai lamah chuan Complaint Fee pek a ngai dawn lo a ni.

Comments

Popular posts from this blog

Bialtu MLA in Laptop pe