Azadi Ka Amrit Mahotsav (AKAM) denchhenin Serchhip-ah ‘Iconic Week’ hman a ni

India ram zalenna kum 75-na lawmna, Azadi Ka Amrit Mahotsav (AKAM) kal zelah Serchhip-a Bank hrang hrangte chuan nimin khan 'Iconic Week' an hmang a, he hunah hian Loan la tur mi 46 te hnenah Loan Sanction Letters sem nghal a ni bawk.


Serchhip Sub-Hqrs. YMA Conference Hall-a 'Iconic Week' puala hun hman hi Serchhip Sub-Hqrs. President Kawlthuama chuan khuallian nia hmanpuiin kum 1600 vela British sumdawng ten India ram an rawn luh hnuah kum 1757 atang khan India rampum chu British awpna hnuaiah a awm tak thu leh a hnu kum 100 vel atangin India chuan zalenna sualin kum 90 hnu, kum 1947-ah India chuan British awpna hnuai atan zalenna a hmuh thu leh India ram chu Democracy ram, mipui ten an aiawh thlanga ro an relna a nih tak thu a sawi a, hetihlai hian kan thenawm mai ah pawh mipui ten Democracy nih tuma hma an lakna te pawh a awm tih sawiin, hei vang hian Democracy kan ni hi kan vanneih zia kan hriat a pawimawh thu a sawi a. India in zalenna a hmuh atanga kum 75-na lawmna kal zelah Serchhip-a Bank hrang hrang ten hetiang hun pawimawh an buatsaih chu lawmawm a tih thu a sawi bawk.

Serchhip Sub-Hqrs. YMA President chuan mipui ten kawng hrang hranga hma kan sawn ve zel thu leh kan dinhmun siamremna atan Bank ten Loan chi hrang hrang an pek thu a sawi a, eizawnna bultanna atan sum lu te kan mamawh thin avangin hetianga Bank te hmalakna chu a pawimawh thu a sawi a, heng an sum puk tir hian mimal, chhungkua, khawtlang leh ram a chawikang tih sawiin, chutihrual chuan Loan latu ten a rulh lehna lam kan ngaih pawimawh a tul thu a sawi a. Loan la ve duh midangte tana harsatna thlentu kan nih lohna tura kan Loan lak te a hun taka kan rulh a pawimawh thu sawiin, kan khawtlang kan than zelna turin Bank ten Loan pekchhuah an uar deuh deuh a tul thu leh Loan latute pawhin a rulh lam kan ngaih pawimawh deuh deuh a tul thu a sawi a ni.

Serchhip-a 'Iconic Week' hman hi Mizoram Rural Bank (MRB) Serchhip Branch Manager Lalrindika Fanai chuan kaihruaiin Sawrkar laipui hmalaknaa Bank ten Scheme an kalpui- Pradhan Mantri Mudra Yojana (PMMY), Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY leh Atal Pension Yojana (APY) chungchang chu SBI Serchhip Branch-a Asst. Manager Lalhmangaihthangi chuan a sawifiah bawk. 'Iconic Week' denchhen hian Serchhip-a Bank 5 ten an hnena Loan laa tur mi 46 te hnenah Loan Sanction Letters semin MRB New Serchhip Branch in mi 13, Mizoram Cooperative Apex Bank leh MRB Serchhip Branch in 10 ve ve,  State Bank of India in mi 8 leh Punjab National Bank (PNB) Serchhip Branch in mi 5 te an ni a, Serchhip-a Bank hrang hrang hnuaia Banking Correspondents hnathawk tha thlanchhuah, Siamtluangi D/o Kungliana, Serchhip Chhim Veng hnenah chawimawina thuziak hlan a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar