Thla thar atang chuan Paper bag chauh hmang tura hmalak a ni tawh ang - DC Serchhip

Serchhip District Bawrhsap Nazuk Kumar IAS chuan Mizoram sawrkar in polythene pan tak hman hi a khap tawh tih sawiin, “Tun thla atang hian hman tlem dan tur zirin tan kan la anga, thla thar atang chuan Paper bag chauh hmang tura hmalak a ni tawh ang,” a ti.


Nimin khan Serchhip District Bawrhsap Nazuk Kumar IAS hoin Serchhip Bazar-a sumdawngte nen Plastic atanga thil siam, chawhmeh funna leh thil dang atana kan hman thinte hman tlem dan tur sawihona chu Serchhip Bazar Building-ah neih a ni a, he hunah hian Bawrhsap chuan Mizoram sawrkar in polythene pan tak hman hi a khap tawh tih sawiin, ei tur, nepnawi leh Bazar chawhmeh funna atan te a kan hman thinte hi khap tura tih a ni tih a sawi a. Plastic atanga siam thilte hi tawih thei lo anih avangin bawlhhlawh sawngbawlna hmunahte pawh a tam ber a ni zel tih sawiin, buaipui a ngai takzet tih a sawi a ni. Bawrhsap chuan Polythene hmang tlem tura hmalakna ah hian Bazara chawhmeh zuartute an pawimawh em em tih sawiin, “A bultantu leh mite zirtirtu in nih a tul a, a theih chin chinah a hman tlem dan tur lo ngaihtuah tan turin ka sawm che u a ni,” a ti a. “Tun thla atang hian hman tlem dan tur zirin tan kan la anga, thla thar atang chuan Paper bag chauh hmang tura hmalak a ni tawh ang,” tiin sawrkar hmachhawp a tarlang a. “Dan hmanga khap beh ai chuan mitinin polythene hman tlem duhna thinlung nei vek zawk ila, kan ram in a hlawkpui hle dawn a, mipuite zirtirna pawh nasa taka kalpui kan tum dawn a ni,” a ti bawk.

He hun hi Serchhip Addl. DC Lalmuansanga Ralte chuan kaihruaiin Plastic atanga thil siam, vawi khat hmana paih mai tur thil hi hman loh dan a awm em tih ngaihtuah a tul takzet tih sawiin, “Kan chhehvel thilte hi kan chenna hmun ang tho a kan enkawl a ngai a. Kan tui tlan ber lui tuite ah kan plastic hman hnute a in zam nuaih zel mai a, hengte hi kan tihtawp a hun a ni,” tiin Plastic tihtlem a tul zia a tarlang a ni.

Hemi hnu hian Polythene hman tih tlem anih theih nana hmalak dan turte sawiho zui a ni a. Bazar a sumdawngte hian tun hma pawhin polythene bag hmang tawh lo turin hma an lo la tawh thin a, mahse a dawrtu mipui lam atanga harsatna an tawh thin avanga an tih zui zel theih loh thute Bawrhsap hnenah hian an lo thlen a ni. 

He hunah hian vawi khat chauh hman theih plastic thatlohna te tarlan niin mihring hri-selna ah nghawng tha lo a neih theih dan te, kan lui tui a tih bawlhhlawh dan te, ramsa leh lui-a nungcha ah nghawng a neih theih dan leh a hal ralna khu thlenga a hlauhawm theih dan te tarlan a ni.

Comments

Chhiar Hlawhte