NH. 54 laihna leivung paih in Mat phai-a Leilet siamtute harsatna a thlen chungchang sawiho a ni

National Highway-54 Serchhip leh Keitum inkar laihzauh hna thawh mekah hnathawktu pakhat in Zawlpui phai leilet tuilakna hnar lama leivung a paih avanga Leilet neitute lungawilohna chu nimin khan Serchhip Police te nen sawihona neih a ni.


Thudawn danin Serchhip leh Keitum inkara NH. 54 laihzauh hna Kram Infracon Pvt. Ltd. ten an thawh mekah hian Davids Construction te chuan Sub-Contract in kawng laih hna hi an thawk chhawng a, heng an hnathawhna hmun ah hian leivung paihna tur hmun thum siam a ni chungin heng hmun ni lo-ah hian paih thin a ni a, Zawlpui Zau, Lumtui Zau leh Tuichar Zau-a leilet neitute chuan hetianga a hmun lo-a leivung paih hian Fur a lo thlen hunah Leilet neitute tan harsatna a thlen dawn nia hriain an ngaihmawh thu hi hnathawktute hnenah hian an lo thlen tawh thin tih nimin-a an inkawmna ah hian an sawi a ni. Hei bakah hian leilet neitute chuan a ram neitu Village Council te nen en ho hnuah leivung paihna tur hmun an siam ni lova leivung paih a la ni chu an ngaihmawh thu an sawi a, an harsatna te an sawi hnuah pawh a paihna tur hmun ni lo ah leivung hi vawi engemaw zat paih a la ni tho tih sawiin, helai hmuna hnathawktute hnena an harsatna an thlenin ngaih pawimawh a hlawhloh chuan nakin zelah boruak thalo zawk a thlen an hlauhthawn avangin tha taka inbiakna kalpui an duh tih an sawi a. Leivung an paih ten an Leilet a tihchhiat lohna tura ruahmanna siam vat an duh thu leh hetiang anih loh chuan leivung an paih avanga chhiatna an tuar ah zangnadawmna pe tura an phut thu pawh he hunah hian an sawi bawk a ni.

He hunah hian lawng laih hna thawktu Davids Construction neitu, David Lalthawmmawia chuan Zawlpui, Mat Phai-a leilet nei te chhiatna tur an duhlo tih sawiin, NHIDCL te nen an norms-ah ‘Ram neitute nen insiamrem-a leivung paih an remtih chuan a portion changtute thu a ni ang’ tih a awm angin a ram neitu mimal leh an mahni inremsiama leivung chu paih anih thu a sawi a. Leilet neitute chhiatna an duhloh angin an harsatna sutkian anih theihna tura ruahmanna dang siam chu harsatna a awmlo tih sawiin, hun hmasa lama hnathawktute bula an harsatna an sawi erawh Serchhip-ah a awmloh avangin a hrelo niin a sawi thung a ni.

Nimin-a inkawmna hi Serchhip Police Station-a Office Incharge C. Lalremthanga chuan kaihruaiin boruak tha tak hnuaia sawihona an neih hnuah leivung paihna hmun pawh hi en ho a ni a, Leivung hi Kawrte remchang hmun dangah paih chhunzawm tawh lovin Leivung paihna tur bik (Spoil Bank) hmun 3 an siamah chauh paih tawh turte, Fur ruahtui tlak tam hma ngeia Leivung dawlna tur tha tak siam tur leh Fur ruahtui tlak hunah pawh Zawlpui tuilakna tichhe phak lo tur, hmundang mual remchang zawn nise tiin thutlukna an siam a ni. He inkawmna ah hian Zawlpui FMC hruaitute bakah Lumtui Zau leh Tuichar Zau-a leilet neitu leh siamtu mi 44 zet an kalkhawm bawk a ni.

Comments

Popular posts from this blog

Bialtu MLA in Laptop pe