Mizoram University Convocation vawi 16-na President Ram Nath Kovind hovin neih a ni

India President Ram Nath Kovind chuan zan khat riak turin nimin khan Aizawl a rawn thleng a, MZU Multipurpose Hall-a Mizoram University (MZU) chuan Convocation vawi 16-na chu India ram-a University zawng zawnga hotulu ber, Visitor of the Central Universities a nihna angin khuallian niin a hmanpui a ni.

MZU Convocation vawi 16-na ah hian President Ram Nath Kovind chuan Mizoram University-a zirlai hlawhtlingte leh an nu leh pa te chu thinlung taka a lawmpui thu sawiin, tun tuma MZU atanga Degree nei leh a titha filawr thlanchhuah zinga tam zawk hmeichhia an nih avanga lawmawm a tih thu sawi a. Mizoram-a hmeichhe lehkhathiam rual te hlawhtlinna atang hian India ramah hmeichhia ten nasa takin hma an sawn tih a lang a ni, a ti bawk a. MZU-ah zirtirtu tha tak tak, Research Works-a hnuhma nei tha tak tak an awm avangin MZU hian tun aia nasa zawkin hma a sawn zel dawn thu leh lawmawm a tih thu a sawi a. NEP 2020 thil tum ber Research Based Education te, Skill Development, Entrepreneurship leh Vocational Education te a ni tih sawiin, hemi huangah hian MZU in hmalakna thui tak a kalpui tawh a, Department of Science & Technolgy, Govt. of India nen thawkhoa Incubation Centre pathum lai MZU in a din chu hmasawnna nasa tak a ni tih a sawi a. A bikin Mizoram thalai te, mahni kutke-a eizawnna din tum leh midangte tana hna siam tum te tan intahhriamna leh inzirna hmun tangkai tak a ni chho dawn  tih a sawi bawk.

MZU Convocation-ah hian President, Governor, Chief Minister leh Convocation puipa ten Convocation kawrfual an hak hnuiin Degree dawng tur zirlai hlawhtling te hi Hall-ah an hruai lut a. Hemi hnu hian Vice Chancellor Prof. KRS Sambasiva Rao chuan Convocation neih tan a ni tih puangin MZU report a pe chhunzawm nghal a. MZU hi kum 2001 khan din niin a Campus zau zawng hi 978.19 acres a ni a, hun reilote chhungin MZU chuan kawng tinrengah hma a sawn a. India ram zirna lian dangte laka MZU danglam bikna chu a chhungah Ragging a awm ve lova, a chhuanawm em em a ni, a ti a. Tunah hian MZU tihhmasawnna tur project lian tham tak tak te cheng vbc. 250 hmangin thawh mek a ni tih a sawi bawk.

Hei bakah hian NAAC in kum 2014 leh 2019 khan MZU hi a endik hnuah Grade ‘A’ a pe a. Kum 2016 leh 2021 inkarah khan NIRF chuan MZU chu India ram-a University thazual Top 100 zingah a dah tih a sawi a ni.

MZU hian Academic Department 38 a nei mek a, UG, PG, M.Phil leh Ph.D zirna School of Study 6 hnuaiah a kalpui a. Constituent College pakhat neiin Affiliated College 35 a nei tih a sawi bawk a. Tunhnai kum 4 chhungin MZU chuan Zirna thar (new courses) 9 a hawng thar a, Constituent College – Pachhunga University College-ah Zirna thar 5 a hawng leh bawk a. Chanchinthar ber an hriat danah Mizoram University Southern Campus chu Lunglei-ah kalpui theih tep niin Ministry of Education pawhin rawtna thehluh hi an pawm thuai a beiseiawm hle a ni, a ti.

Nimin-a he hun hman ah hian lawmman leh Degree hlanna hun hman niin Chief Minister Zoramthanga’n Book Prize dawngtu zinga mi 3 thlanchhuah hnenah lawmman a hlan a. Ph.D Certificate hmutu 68 zinga mi 10 thlanchhuah hnenah Governor Hari Babu Kambhampati chuan Certificate hlanin Gold Medal dawngtu 38 zinga thlanchhuah mi 10 hnenah President Ram Nath Kovind chuan tangkapui leh thuziak a hlan leh a. Lawmman leh Degree semna neih hnu hian he Convocation pual thuchah President Ram Nath Kovind chuan a sawi a. Lawmthu sawina hun Registrar Prof. Lalnun-danga chuan neiin Convocation hi khar a ni.

Tun tuma MZU Convocation-ah hian Degree, Gold Medal leh Prize dawngtu 7830 an awm a; hrileng avangin mi 545 chiah a hmunah sawm niin MZU-ah hian thawktu Post 95% chu hnawhkhah a ni.