Mizoram pum huap Wrestling intihsiakna naktuk atangin Serchhip-ah neih a ni dawn

Mizoram pum huap District hrang hrangte Wrestling-a intihsiakna leh Mizo Inchai-a Mizoram Champion nilai te hmachhawn thei tur zawnna chu naktuk atang khian Serchhip-ah neih a ni dawn a, he intihsiakna a tel turte chuan Vawiin hian Serchhip an rawn thleng ang.

Serchhip khua in he intihsiakna a thlen tur chungchangah hian nimin khan Organising Committee te chuan Serchhip District Wrestling Association (SDWA) President K. Tlangthanmawia hovin Serchhip Press Club-ah tualchhunga thuthar thehdarhtute an kawm a, he hunah hian SDWA President chuan hetiang intihsiakna liantham Serchhip khua in a thleng chu thil chhinchhiah tlak a nih thu leh an pawl in an thlen ni lovin, Serchhip District in an thlen a ni tih hriain mipuite pawh mikhual te tha taka lo dawngsawng tura an beisei thu a sawi a ni.

He hunah hian Organising Committee Chairman C. Laldinpuia leh Secretary T. Lalengruala bakah hruaitu dangte telin Inter-District Mizoram Wrestling Championship, 2022 vawi 5-na leh Mizo Inchai-a Mizoram Champion te hmachhawn tur zawnna tur atana an inbuatsaih dan te an sawi a, heng intihsiakna a tel turte hian Vawiin hian Serchhip rawn thlengin naktuk zingkar-ah an rih zawng buk an ni anga, chawhma dar 11:00-ah intihsiakna tanin chawhnu dar 1:00-ah a hawnna hun erawh hman tur a ni dawn a, naktip-ah zawhfel nghal tura ruahman niin chawhnu lamah a kharna hun hman tur a ni dawn a ni. He intihsiakna ah hian District hrang hrang atangin infiammi mi 100 vel tel tura beisei an ni a, Organising Committee hnuaiah hian Sub-Committee panga (5) siam niin heng Sub-Committee te hian hma an la chho mek a ni.

Inter-District Mizoram Wrestling Championship, 2022-ah hian Mipa lamah kg. 35 hnuailam atanga tanin kg. 60 chunglam thlengin intihsiakna neih a ni dawn a, hmeichhe lamah kg. 36 hnuailam atanga kg. 61 chin chunglam thleng inelna neih a ni dawn a, Senior Category-ah Mipa tan kg. 57 atanga kg. 96 chunglam thleng tan inelna neih tur niin Hmeichhe lamah kg. 50 hnualam atanga kg. 68 chunglam thlengin inelna neih a ni dawn bawk a ni. Mizo Inchai-a Mizoram Champion lai te hmachhawn thei tur zawnna ah erawh tel tur zat hriat theih ni lovin a duh apiang tan inziahluh theih a ni dawn a, Hmeichhe lam tan Nute (kg. 60 hnuailam), Nulaihawl (kg. 70 hnuailam) leh Nulian (kg. 70 chunglam) tan inelna neiin Mipa tan Pate (kg. 65 hnuailam), Palaihawl (kg. 80 hnuailam) leh Palian (kg. 80 chunglam) tan inelna neih a ni dawn a ni.

SDWA hruaitute chuan Inter-District Mizoram Wrestling Championship-ah hian Champion ngei an inbeisei tih sawiin, Mizo Palian Inchai Champion lai hmachhawn tur zawnna ah hian Serchhip atangin Raymond Lalthansanga S/o T. Rengkhuma, Chanmari Veng chu a tel dawn thu an sawi bawk a ni.