Serchhip leh Sairang-a Police Checkgate-ah dan lova Kuhva rah tawlh man a la awm lo

Khawchhak lam atanga bungrua rawn lut leh dan lova bungraw tawlh te lo enfiahna tura ruahman Serchhip Sailiamkawn-a Police Check Post chu hman a nih hnuah Dan bawhchhia a bungraw tawlh man a la awm lova. Sairang a Checkgate siam-ah pawh dan lova Kuhvarah tawlh man a la awm lo nia thudawn a ni bawk.

Central YMA chuan Mizoram kaltlanga Kuhvarah tawlhruk venna tur Checkgate siam tura Chief Minister Zoramthanga leh sawrkar hotute dangte an ngen hnuah Serchhip Sailiamkawn leh Sairang-ah te hian Check Post siamin Checkgate hi hawn a ni. Sairang Checkgate-ah hian February 14, 2022 khan Police an duty tan a, Sailiamkawn Checkgate chu February 17, 2022-ah hawn a ni thung.

Serchhip Sailiamkawn-a Police Check Post hi nimin khan LENKAWL chuan a hmunah tlawhin helai hmuna Duty te chuan an hnathawh dan hrang hrang an lo hrilh a, he Check Post hi kumin February 17 khan hman theih tura hawn niin Head Constable hovin Constable pathum te chu engtiklai pawh duty tura dah an ni a, he Check Post hawn a nih atanga nimin thleng khan lirthei 376 enfiah ni tawhin February thla ah 96, March thla ah 260 leh April thla kan hman mekah lirthei 20 enfiah a ni tawh a. Helai hmuna Duty te chuan chhun lamah helai hmunah hian MVI te an duty thin bawk tih sawiin, zan lamah erawh chuan uluk lehzuala Police te hi an duty thu an sawi a, lirthei kal zawng zawng enfiah lovin bungraw phur leh rinhlelhawm zual te an enfiah thin thu leh tun thlengin dan phalloh ah Kuhvarah leh thildang phur man an la neih loh thu an sawi a, amaherawh chu thuneitu sang zawk te thu angin lirthei document fello leh sawrkar thupek zawmlo te erawh man an neih thin thu sawiin, tun thlengin dan bawhchhia hi mi 42 man an nih tawh thu leh heng te hi Dan anga pawisa chawitir thin an nih thu an sawi a. Dan bawhchhia an man zinga a tam zawk te hi document fello te an nih thu an sawi bawk.

Sairang Checkgate-a duty-te chuan darkar 24 chhung an duty thu sawiin, “Truck bungraw phurte kan endik thin a, kuhva tawlhruk tur man kan la nei lo. Tum khat chu kuhva rah kan man tawh a, mahse hei chu ram pawna tawlhruk tur ni loin, tualchhunga hralh tur a ni. Myanmar atanga kuhva rah an tawlhruk ang chi pawh a ni chiah lo,” an ti a. Kuhva rah tawlhruk chuan ziaawm lam a pan deuh tawh a ni mai thei tih sawiin, “State pawn lamah an phurh tlang theih tawh chuan loh avangin tawlhruk tum pawh an awm vak tawh lo a ni mai thei,” an ti a, anmahni hel-a kuhva tawlhru an awm leh awm loh chu an hriat bik loh thu an sawi a. Duty chungchang ah hian harsatna an tawh loh thu an sawi bawk a ni.