Hri leng karah Zirna In hawn tan niin hri avanga zirna In hawn theihloh awm rih lo
COVID-19 hri leng avanga kum 2 zet zirna In te hawn mumal theih a nih loh hnuah nimin khan Mizoram pumah zirna In hawn tan a ni leh ta a, Serchhip District-ah hri leng avanga zirna In hawn theih loh a awm lo nia thudawn a ni.
COVID-19 hri leng avang hian kum 2020-2021 leh 2021-2022 Academic Session-ah te Mizoram-a zirna In te hawn mumal theih a ni lo tawh a, hri leng in ziaawm lam a pan hnuah Mizoram sawrkar chuan Academic Session thar, 2022-2023 atangin zirna In te hi Dan pangngai anga inhawng tawh tura tiin hemi atan hian zirlaite leh zirtirtute tan SOP pawh ruahman a ni a, heng SOP zawm chung hian nimin khan zirna In te hi hawn tan a ni ta a ni.
Serchhip District-a zirna In hrang hrang zingah hri leng avanga hawn theihloh a awm lo tih Education Department-a thawk te chuan LENKAWL an hrilh a, Serchhip Block hnuaiah Primary School 77, Middle School 69, High School 32 leh Higher Secondary School 8 awmin East Lungdar Block-ah Primary School 26, Middle School 27, High School 14 leh Higher Secondary School pathum an awm bawk a, heng zirna In hrang hrangah hian Zirtirtu leh zirlai ten School kal thei vekin Vanchengte M/S-ah erawh chuan zirtirtute mi 4 zinga mi 3 te chu COVID-19 hri an kai avangin Zirtirtute pakhat chiah a kai thei a ni.
Serchhip District-a zirna In hrang hrangte hian School tan ni hian zirna an la kalpui meuh lova, zirlai lut thar te lawmna te neiin zirna In thenkhat chuan thuziak chi hrang hrang nen zirlaite lawmna an nei a, zirna In thenkhat ah chuan hriat tur pawimawh te in hriattirna hun hmangin zirna In thenkhat ah chuan zirlaite tan inziahluhna neih a ni bawk a. Vawiin lam atang hian mumal zawkin zirna hi kalpui a ni hlawm ang.
School Education Minister Lalchhandama Ralte chuan hripui avanga kum 2 zet sikul khar anih tawh hnuah sikul hawn a lo ni ta leh zirlaiten sikul an pan leh thei ta chuan a tihlim hle tih a sawi a. Zirlaite leh zirtirtute a lawmpui tih sawiin, sikul kal theih loh chhung hian zirna chu online leh kawng danga kalpui ni mahse, network that tawk loh avang leh hmanrua neih that tawk loh avangte in zirlaiten an thiam tur ang an thiam fumfe loh palh thei tih a sawi a. A dan pangngai a Sikul hawn a ni thei leh ta hlauh chu School Education lama thuneitute duhthusam tihhlawhtlinna a nih thu leh a lawm takzet tih a sawi a. Zirna boruak tha a awm leh thuai theih na turin zirtirtute hmalakpui turin khawtlang hruaitute chu a sawm a, nu leh pa te pawh inchhung lama tan la theuh turin a sawm a ni.