Serchhip District Task Force on Immunization in hriselna kawnga hmalakna an thlirho

Serchhip District Task Force on Immunization te chu nimin khan an Chairman leh District Bawrhsap Nazuk Kumar hova thukhawmin District chhunga Immunization Vaccine leh COVID-19 vaccine pek tawh dan bakah Malaria dona kawnga hmalak dan te an thlirlet a, hei bakah hian National Deworming Day hman dan tur leh Health Mela neih dan turte pawh an sawiho nghal bawk.

He thutkhawm Serchhip District Bawrhsap Pisa-a neih ah hian Serchhip CMO Dr. Lalzawmi leh DMS Dr. ZD. Lalnuanawma te bakah member dangte telin tun thla ni 12 thleng khan Serchhip District-ah COVID-19 vaccine chu kum 18 chung lamah mi 39,349 ten Second Dose an la tawh tih tarlan niin, hri danna pek tura tinzawn zat 47,731 atanga chhutin za zela 82.43 ten hri danna hi an la tawh a. Precaution Dose pawh hi mi 2448 in an la leh tawh bawk a ni. Hei bakah hian kum 15-17 inkar zingah mi 2132 in 2nd dose an la zo tawh a, hri danna pek tura tinzawn zat 3305 atanga chhutin za zela 64.50 ten hri danna an la tawh anga chhut a ni bawk a. Kum 12 leh 14 inkarah Vaccine First dose pek hna kalpui mek niin mi 1821 in First dose hi an la tawh a, hri danna pek tura tinzawn 2507 atanga chhutin za zela 72.63 ten vaccine an la tawh a ni.

Hei bakah hian nikum March atanga February 2022 inkarah nausen kum khat leh a hnuai lam vaccine pek tura tinzawn 1111 awmin an zinga 879 te chuan vaccine an lak tur zawng zawngte an la zo a, vaccine lak tur la zo thlapte hi za zela 79.11 an ni bawk.

He hunah hian Serchhip District-a Malaria dinhmun pawh tarlan niin nikum (2021) January atanga December thla chhung khan Serchhip District chhungah Malaria vei mi 45 hmuhchhuah an ni a, an zinga mi 2 te chuan an thihpui a. Malaria hrik kaite hi ram hna thawka riahchilh thinte an tam ber thu tarlan a ni a, he natna laka kan him tlan theih nan mitinte mahni hnathawhna ah fimkhur tur leh inrinhlelhna neite chu rang taka in test thuai tura ngen an ni.

National Health Missions (NHM) hmalakna in tun thla ni 18 khian Chhingchhip leh a chhelvel khuate tan Chhingchhip-ah Health Mela buatsaih a ni dawn tih he hunah hian tarlan a ni a, Health Mela-ah hian Doctor rual te leh thawktu dang ten a thlawna inentirna leh Medical Exam chi hrang hrang an buatsaih dawn a. Hetiang bawk hian tun thla ni 25 khian E. Lungdar leh a chhehvel khua te tan East Lungdar-ah buatsaih a ni leh bawk ang.

National Deworming Day hman dan tur pawh he thutkhawm ah hian sawiho a ni bawk a, tun thla ni 24 khian NDD hawnna hi neih tura ruahman niin he hmalakna hnuaiah hian kumdang ang bawkin naupang kum 19 leh a hnuailam zawng zawngte chu Rulhut hlo eitir vek tur an ni ang.