ILP fello mi 22 thawnkir

Central YMA ruahmanna siam angin nizan hmasa khan Serchhip Sub-Hqrs. YMA leh Ser-chhip Police te chuan Serchhip khawpui chhung ah dan lova hnamdang awm dapchhuah hna thawkin ILP fello mi engemaw zat hmuhchhuah an ni.


Nizan hmasa a Serchhip Police te kaih-hruaina hnuaia ILP enfiah hna thawh ah hian Serchhip khawpui chhung Veng hrang hrang atangin ILP fello leh lo kawl lo mi 55 zet hmuh-chhuah niin heng te hi Serchhip Police Station-ah hruaikhawm an nih hnuah ILP buaipui lai mek tih finfiahna nei mi 29 te chu chhuah leh an ni a, dang 22 te chu nimin khan Serchhip District Court-ah hruai niin midang 4 te chu kum tlinglo an nih avangin a hrana buaipui an ni thung. ILP fello manchhuah mi 22 zinga 6 te hi ILP neilo hrim hrim an ni a, midang 16 te hi ILP thi tawh te an ni.

Heng ILP fello te hi nimin khan Serchhip District Court-ah hruai niin Rs. 500/- theuh chawitir an ni a, hei bakah hian a tul anga Dan anga hma la chhunzawm tura Serchhip Police Station OC chu tih niin ani hian nimin tlai khan heng hnamdang mi 22 te hi Police te venhimna hnuaiah a thawnkir nghal a ni.

Hetihlai hian kumin January thla atanga nimin thleng khan Serchhip District-ah ILP 257 pekchhuah an ni tawh a, heng zinga 146 te chu ILP thar pekchhuah niin a dang 111 te chu ILP nei tawh tihnun thar leh an ni thung a. January thla khan ILP thar 6 pechhuakin 9 renew a ni a, February thla ah ILP thar 47 pechhuakin 67 renew a ni bawk a, March thla ah ILP thar 61 pechhuak in 19 renew a ni bawk a, April thla kan hman mekah ILP thar 32 pechhuak tawhin 16 renew a ni tawh bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man