Sawrkar siam leh tura rinna siam kawngah mipuiin MNF-ah rinna an nghat nasa - MNF President

Zonuna Kawlni (LENKAWL) • April 1, 2022 • Comments • Mizoram

MNF President Zoramthanga chuan kum 2023-a Sawrkar leh tura rinna siam leh bengkhawn kawngah mipuiin MNF-ah rinna an nghat nasa hle a ni tih a lang mek zel tih sawiin, “Tun dinhmunah Party dangin sawrkarna an siam ringa dahkham dah ngam hi an awm meuhin a rinawm loh,” a ti.

Nimin-a Lunglei Mizo Hnam Run-a mithar lawmluhna hun buatsaih ah he thu hi sawiin MNF President Zoramthanga chuan SEDP hmanga hmalakna liantham bul an tan chhoh mek chuan midang a tizam viau mai tih a sawi a, Movement an intih laia ZPM kalphung thar chu anmahniin an thlak zung zung avangin mi tam takin Party-a inlet ta ZPM-ah rinna nghah a har an ti em em tih a sawi a, “Ze ngai thlak thei lo, inthuamna chauh thlak chhen te hi mipuiin an chungah rinna nghah ngam har an ti a ni. Hmana Pu Duha tho kha Vawiin-a Pu Duha hi a lo la ni a. A hrechiang apiangin an tlansan zel mai a ni,” a ti bawk.

Congress Party chungchang pawh MNF President chuan sawiin, “Congress down lutuk hi a buaithlak a, dahkham chawi fur an ni ang tih hi a hlauhawm zawk a ni. An pu ber bu lum Serchhip By-Election-a an Candidate halral thil hlana hlan a, dahkham an chawitir hian Congress tlakchhiat tawhzia leh beidawn tawhzia a tichiang hle a ni. An beidawnna a kaltluan zel chuan Artelukawn mai an hlat lo a ni,” a ti bawk.

MNF President chuan RD Block puanna hun hlimawm tak an hmangzo chiah tih pawh sawiin, “Tlabung bial pawh MNF tan bial him a nih ngei kan beisei tawh a ni. MZU Southern Campus hawnna tur leh MPSC Lunglei lama hnathawk tur pawh a rang thei anga bawhzui a ni ang. Lunglei chhung kawng chhe zual lai thawm-that hna pawh thawk thuai turin kan inbuatsaih mek a, kawng pawimawh dang sial thar hna pawh thawh thuai a ni dawn a ni,” ti a. “Zoram mal-sawmna haichhuakin, Pathian leh kan Ram tan ti zelin kan bei zel ang a, hman ata ram leh hnam tana kan engkim kan hlan ngam angin kan bei zel ang a, kum 60 zet min hruaitu Pathian hian engti kawng mahin kawng laklawhah min kalsan dawn lo a, Varparh Arsi chu a eng zual zel dawn a ni,” a ti a ni.