LENKAWL ADS (Computer zir duh tan 6) :

Nimin khan All India Survey on Higher Education (AISHE) Report thlirhona leh Mizoram dinhmun te sawihona chu Higher & Technical Education Board Vice Chairman Dr. Vanlaltanpuia hovin neih a ni.

Hotel Regency Conference Hall, Aizawl-a he sawihona ah hian Dr Vanlaltanpuia chuan Gross Enrolment Ratio (GER) 2019-20 (data thar ber) atanga a lan danin Mizoram GER chu 25.7 a nih laia National GER average chu Mizoram aia sang 27.1 a ni chu thil enchian ngai tak a ni tih a sawi a. Mizoram chu India ram State zingah ziak leh chhiar thiam tamna, Literacy rate sanna berState zinga mi ni si a thalai kum 18-23 inkar, Higher studies-a inziaklut (enrolled) an tlem em em anga report a lang pawh thil enzui ngai tak nia a hriat thu a sawi a. He data hian khawpui leh thingtlanga zirna rualkhai taka kalpui dan turte, zirtirtu semrual dan turte, sawrkar sum hman dan tur thlengin a nghawng dawn tih sawiin, hemi chungchangah hian Concerned Departments, a bik takin School Education leh Higher & Technical Education te bakah mimal Researcher te ngaihtuahna nasa zawk seng turin a ngen bawk a ni.

He hun kaihruaitu Prof. Jamal Hussain, Department of Mathematics, MZU, State Nodal Officer, AISHE, Mizoram Unit chuan power point hmangin he report sawifiahna a nei a, Higher & Technical Education department leh Mizoram chhunga College leh zirna In sang te nena an thawhhona tha tak avangin lawmthu a sawi bawk.