Ramri-a insumdawn tawnna Governor sawipui

International Trade Initiative Forum (ITIF), Mizoram chuan nimin khan Mizoram Governor Hari Babu Kambhampati chu Raj Bhavan-ah kawmin Zokhawthar-a Indo-Myanmar Trade pangngai taka a kal theih dan tur an sawipui.

Zokhawthar-a Land Custom Station (LCS) kaltlanga ramri insumdawn tawnna hi hun engemaw chen a chawl titih tawh a. Hemi chungchangah hian ITIF, Mizoram chuan March 29, 2022 khan Prime Minister Narendra Modi hnenah lehkha leh Memorandum thehlutin he hmalakna kal zelah hian nimin chawhnu khan ITIF Mizoram chuan Raj Bhavan-ah Governor Hari Babu Kambhampati an kawm a. Governor hnenah hian lehkha an thehluh bakah dan pangngai a Zokhawthar Land Custom Station (LCS) kaltlanga ramri insumdawn tawnna a kal thuai theihna turin hma la turin an ngen bawk a ni.

Governor chuan Mizoram chu nakin lawkah sumdawnna hmunpui a ni thuai dawn tih sawiin, sumdawnna hmunpui ni tur pawhin kawngpui te, Rel kawng te, KMMTTP leh hmasawnna ruhrel lian dang te hmangin Mizoram chu chei mek a ni tih a sawi a. Ramri insumdawnna kawnga mipuite zirtirna kalpui a ITIF Mizoram in hma a la chho chu lawmawm a tih thu a sawi a. Tuna Indo-Myanmar Border trade pangngai taka a kal theih loh chhan te lo zirchian a tum thu leh a tul anga hmalak a tum thu a sawi a ni. Governor chuan India sawrkar chuan a thenawm ram nena insumdawn tawn leh inlaichinna tha tak neih chu a duhdan a nih thu a sawi a. Sawrkar chuan ramri insumdawnna chu a ngai pawimawh ngei ngei dawn tih sawiin, sumdawng duh tan pawh awlsam taka bul an tan theihna tur thlengin inkaihruaina a siam tha chhunzawm reng a ni, a ti.

ITIF Mizoram hruaitute hian Governor hnenah hian an hmalak dan te leh tunah an thil buaipui chu Mizoram tan mai ni lo, India ram tana thil pawimawh tak leh chinfel ngai a nih thu te an sawi a. Hemi hnu hian Zokhawthar Land Custom Station (LCS) din a nih dan te, India leh Myanmar insumdawn tawnna chu Zokhawthar-ah hian bungraw in thleng ang deuhin kum 1995-ah bul tan a nih hnuah December 2015 khan India sawrkarin ramri insumdawn tawnna pangngaiah a hlan chhoh thu te an sawia. Kum 2015 leh tun inkarah Zokhawthar-ah hian mumal tak leh dan anga sumdawnna kalpui a nih loh thu sawiin, hei hi chhan hrang hrang a awm thu an sawi a, helai hmunah hian dan anga sumdawnna kalpui a nih tak loh hnuah sawrkar phalloh thil tawlhnan leh dan kalh a insumdawn tawnna hmun a chang ta nia an hriat thu leh pawi an tih thu an sawi a ni. He Custom Station enkawltu tur thawktu pawh an awm mang loh thu sawiin, helai hmuna insumdawn tawnna atana sawrkarin a tihtur te tih a nih a nih thuai theih nan hma lak sak turin Governor chu an ngen a ni.