Power-a Mizoram harsatna Union Minister ah a thlen

Mizoram Governor Dr. Hari Babu Kambhampati chuan Union Power Minister RK. Singh chu niminpiah khan New Delhi-a a Ofice-ah hmuin Kawlpetha avanga Mizoramin harsatna a tawh mek chungchang leh he harsatna sutkian a nih theih dan tur te a sawipui.

Governor leh Union Minister te inkawmnaah hian Mizoram-ah Kawlpetha avanga harsatna a awm mek chungchang, a chhan hrang hrang leh he harsatna sutkian a nih theihna tura hna thawh hmasak tul lai te sawi a ni a. Electrict ban lian leh hruipui thlun belh chungchang te, Hydel Electricity Project thar siam belh tulna te bakah Nizung chakna hmanga Electrict Current tam zawk siam dan turte pawh an sawidun bawk a ni.

Governor Hari Babu Kambhampati chuan Mizoram Sawrkar hnuaia Power & Electricity Department in project pawimawh zual central sawrkar a thehluh tawh chungchang leh heng project te kalpui a nih thuai na tura sanction tih thuai mamawh a nih dan te pawh a sawi a. Mizoram chhungah luiluang chakna hmangin Kawlpetha tam tham tak siam theih a ni thu pawh Union Minister hi a hrilh a. Kawlpetha avanga kan State harsatna te a hmunah rawn hmu chianga, a sutkian dan tur te ngaihtuahpui turin Union Power Minister RK. Singh chu remchang hmasa bera Mizoram rawn tlawh turin a sawm bawk a ni.