Dr. R. Lalthangliana’n Central a dawr chhunzawm

New Delhi-a cham mek Commerce & Industries Minister Dr. R. Lalthangliana chuan nimin khan sawrkar laipui-a mi pawimawh te a kawm chhunzawm.

Dr. R. Lalthangliana hian Union Finance Secretary TV Somanathan chu hmuin Mizoram-a Micro-Enterprises sumdawnna tenau nei ho Covid-19 vanga harsatna lian tak tawkte tanpuina leh chhawmdawlna tur nikum December, 2021-a amah ngeiin Union Finance Secretary hnena a lo thlen tawh chu a thlen nawn leh a, Union Finance Secretary hian lo ngaipawimawhin, PM Special Package lam atanga ti turin hma a la dawn tih a sawi a, ziakin lo a lo bawhzui ngei dawn tih a lo hrilh a ni.

Hemi hnu hian MSME-a Secretary BB. Swain pawh hmuin MSME hnuaia Mizoram tana Scheme thar a hmalakna tur chi hrang hrangte a sawipui a, a bikin Promotion of MSMEs in NER and Sikkim hnuaia dil mek Scheme 7, a vaia cheng vbc. 67.45 hu chu a sawipui a, MSME Secretary chuan a thil thlen hi lo ngai pawimawh in theih anga hma lo lak pui zel a tum thu a lo hrilh a ni. Hei bakah hian Tribal Affairs-a Secretary Anil Kumar Jha leh Ministry of Home Affairs-a Secretary (Border Management) Dr. Dharmendra Singh Gangwar te pawh hmuin thil pawimawh a sawipui bawk a ni.