Lirthei chesual-ah mi 4 boral

Zirtawpni zan-a Lungtan (Khawzawl District) atanga Aizawl pana kal Maruti Car (Alto 800) chu Inrinni zan khan Chhingchhip dai-ah chesualin a chhunga chuang mi 4 te an thi vek.

Thudawn danin he Motor hi Lungtan VC Vice President ni mek R. Laldingliana ta leh ama khalh niin Lalsangliana leh PC. Lalremruata, Aizawl Republic Veng ve ve te chuan hmangin Zirtawpni zan dar 7:00 vel khan Lungtan atang hian rawn chhuakin Lungtan khuaa Tlangsiama chu a chuang ve bawk a. Hemi zan zanlai vel hian Khawlailung an thlen thu an chhungte hnenah hian hrilhin biak zui theih an ni lova, Aizawl lam an thlen bawk si loh avangin an chhungte hian Serchhip Sub-Hqrs. YMA hruaitute rawn biain Khawlailung leh Keitum inkar bakah Keitum leh Serchhip inkar ah te zawn nghal an ni bawk.

Serchhip Sub-Hqrs. YMA hruaitute hian Serchhip Police te pawh hriattir nghalin hemi zan a Sailiamkawn paltlang lirthei CCTV Camera in a lo lak te enfiah ni lehin he lirthei hian Sailiamkawn a paltlang ngei nia hriat a nih avangin Sialsuk tlangdung bakah Lamchhip lam kawng leh Chhingchhip tlangdung lam kawng ah zawn nghal an ni a, Inrinni zan dar 8:00 pelh hnu khan Chhingchhip leh Buhkangkawn inkar, MIFCO Complex bul kawngthlang ah he Motor hi a che-sual tih hriat zui a ni a, motor chetsualna ah hian a chhunga chuang te hi an lo boral vek a ni.

Motor chetsualna hi NH. 54 laihzauh meka leivung paihna lai niin Chhingchhip-a Police te pawh an kal nghal a, an chetsualna hi a awih avang leh leivung paihna a nih avangin ruang pawh hi lakchhuah harsa deuhin zanlai pelh hnuah lakchhuah a ni a, Chhingchhip-a an ruang lak a nih hnuah Aizawl mi pahnih te hi Aizawl lama Postmortem tur leh Lungtan lam mi te hi Ser-chhip-a Postmortem turin lak a ni a, Lungtan lam mi te hi nimin khan an khua panpui an ni.