Lawmthu sawina hun hmang

Inrinni khan Chin TV huaihawtin Aizawl a Dawrpui Multipurpose Hall-ah tunhnaia Myanmar raltlante Mizoram sawrkar leh mipui ten an lo dawnsawn dana lawmthu sawina hun hman a ni a, he hun hi East Tuipui bialtu MLA Ramthan-mawia chuan hmanpuiin Mizo mipuiten harsatna an tawh laiin Myanmar mipui ten duat takin an lo enkawl tawh thin tih a sawi a, “Mizoram buai vangin Mizo tam tak Burma-ah an chho a, heng mite hi duat takin an lo enkawl tawh thin a. Tunah Burma lama kan unau ten harsatna an tawk ve leh a, hetiang huna tanpui theia kan awm hi a lawmawm hle a ni,” a ti.

He hunah hian Chin State Chief Minister Salai Lian Luai chuan an buaina hi thla 2/1-a reh mai chi a ni lo tih sawiin, “Mizo mipuite pawh min ning mai lo a, a tawp thlenga min tanpui turin ka duh che u a ni,” a ti bawk. Chin TV hian raltlan buaipui kawnga an thawh that avangin Chief Minister Office, Central YMA, MJA, MZP, ZORO, MRRCM te hnenah lawmthu sawina thilpek an hlan a ni.