KVK North Vanlaiphai-a Ar awpkeuna buatsaih Agriculture Minister in a hawng

Serchhip District-a Krishi Vigyan Kendra N. Vanlaiphai-a Ar awpkeuna (Poultry Hatchery) an buatsaih chu nimin khan Agriculture Minister C. Lalrinsanga chuan hawngin kuthnathawktute tana kalpui zui tlaka an ngaih, hlawhtling taka an enchhin tawh thlai chin dan te leh hnathawh dan phung (approved technology) dahkhawmna lehkhabu chu a tlangzarh bawk.

KVK North Vanlaiphai Meeting Room-a he hun hman ah hian Agriculture Minister chuan KVK a thawktute chu loneitute kal zel nana hmahruaitu pawimawh an ni tih sawiin, an zarah hmasawnna duhawm tak tak kan hmuh tam tawh thu leh an tangkaizia hriain District thar pathum kan neihah te pawh KVK hi dah thuai an duh thu a sawi a, kan lehkha te pawh Prime Minister pisa-ah a awm mek thu a sawi a ni. Agriculture Minister chuan, kan ram hi Pathian in mal a sawm tih sawiin, kan thlai chi enchhin hrang hrangte pawh an thar tha thin hle a, Lintel Dal an enchhinte phei chu a thar hlawk lamah rampum chawhrual aiin a sang zawk thu leh an phur thu a sawi a. Kan rama chin pun zui theih tura enchhinna neih fel vek tawh thlai te leh a chin dan thlanchhuahte an tlangzarh thei leh KVK Serchhip District ten an remhriatna leh inpeknaa an din Ar awpkeuna khawl thar an hawng chu a lawmawm hle tih sawiin, heng lai vela Ar vulhtute tan a tangkai hle dawn a ni, a ti.

Agriculture Minister chuan kan ei bar mamawhte tam zawk leh felfai zawka kan tharchhuah theih nan sawrkar chuan Land Leasing Act te, Collective Farming System te a ngaihtuah chho zel tih pawh sawiin, FOCUS hmalakna hmangin awmze nei zawka buh leh bal thar chunga kan leilung leh ramngaw venhim hna pawh thawh mek zel a ni tih a sawi a. KVK Scientist te chu kan kuthnathawktute tana an pawimawhzia inhriaa theihtawp lo chhuah zel turin a chah bawk a ni.

Nimin-a he hun hman hi KVK Serchhip District-a Senior Scientist & Head Dr. T. Van-lalngurzauva chuan kaihruaiin Agriculture Department Director James Lalsiamliana leh Serchhip DAO Tlangtimawia Zote te pawhin thu an sawi a, KVK-a thawktute atangin Kenny Zohmingliana leh Dr. C. Lalremruata ten Technical Report pein K. Lalmalsawmi chuan lehkhabu tlangzarh tak thlirlawkna a nei a ni. Ar awpkeuna hawn takah hian a rualin Artui 500 a awpkeu tir theih a, Approved Technology tlangzarh takah hian thlai leh a chin dan thlanchhuah 38 a awm a ni.

Comments

Popular News (Last 30 Days)

LPG man bithliah thar